आचार्यसँग मोदीको टक्कर

विराटनगर- मंसिर २१ गते हुने प्रतिनिधिसभा र प्रदेश सभाको निर्वाचनका लागि राजनीतिक दल र उम्मेदवार यतिवेला आ-आफ्नो क्षेत्रका आयोजिक कार्यक्रमहरूमा व्यस्त छन् । निर्वाचनका लागि तयारी गरिरहेका दलहरु अन्तिम समय आउँदासम्म आफ्नो तयारीलाई रणनीतिक बनाउन सक्रिय भइरहेका छन् । सोही क्रममा मोरङ क्षेत्र नम्बर ४ मा निर्वाचनको वातावरण रोमाञ्चक बन्दै गइरहेको छ ।

नेपाली कांग्रेसका प्रतिनिधिसभा उम्मेद्वार महेश आचार्यलाई यसअघि दोस्रो संविधान सभा निर्वाचनमा स्थानीयले जिताएका थिए । चुनावी अभियानका क्रममा ६३ वर्षीय आचार्यले दिगो शान्ति र संविधान कार्यान्वयका लागि कांग्रेसको जित अपरिहार्य रहेको बताउँदै आएका छन् । २०४६ सालमा बहुदल स्थापनापछि जर्मनीमा अध्ययनरत आचार्यलाई प्रधानमन्त्री गिरिजाप्रसाद कोइरालाले अर्थमन्त्रीमा नियुक्त गरेका थिए । ३६ वर्षको उमेरमा अर्थमन्त्री बनेका आचार्यले त्यसपछि, रक्षा, कृषि हुँदै वन मन्त्रालयसम्मको नेतृत्व सम्हाले । अघिल्लो संविधानसभा निर्वाचनमा जित हासिल गरेका आचार्यलाई यसपटक सहज भने छैन ।

संयुक्त बामगठबन्धनबाट आचार्यका प्रतिद्वन्द्वी ३२ वर्षीय अमनलाल मोदी छन् । सुनसरीको डंग्राहास्थित नारायणी मावि र दुहबीको सरस्वती मावि हुँदै विराटनगरको महेन्द्र मोरङ कलेजमै अध्ययन गरेका मोदी २०७० सालको संविधानसभा निर्वाचनपछि समानुपातिक सांसद बनेका थिए । थारु समुदायका मोदी माओवादी सशस्त्र द्वन्द्वका क्रममा भूमिगत थिए । यस क्रममा करिब अढाइ वर्ष जेल पनि परे । आक्रामक शैलीका मोदी संविधानसभा बैठकका क्रममा कुर्सी तोडफोड गरेर चर्चामा आएका थिए ।

उपेन्द्र यादव नेतृत्वको संघीय समाजवादी फोरमले प्रतिनिधिसभाका लागि यस क्षेत्रमा उम्मेदवार उठाएको छैन । मधेश आन्दोलनपछि राम्रो पकड बनाएको फोरमले प्रदेश सभामा भने यहाँबाट रतन यादव र श्रीराम कामतलाई मैदानमा उतारेको छ । त्यसअघि २०६४ सालको पहिलो निर्वाचनमा यस क्षेत्रमा मधेशी जनअधिकार फोरम नेपालका भीमराज राजवंशी १७ हजार ८६ मतका साथ विजयी भएका थिए जतिबेला मधेस आन्दोलन शिखरमा थियो ।

यस निर्वाचन क्षेत्रमा ग्रामथान गाउँपालिका, कटहरी गाउँपालिका, बेलबारी नगरपालिकाको वडा नम्बर ५, ६ र ७ छन् । यहाँ विराटनगर महानगरपालिकाको १, २, ३, ८, १०, १९ छन् । यहाँको कुल मतदाता संख्या ९९ हजार १ सय २३ छ । थारु समुदायको बाहुल्य रहेको ग्रामथानको मतदाता संख्या २३ हजार ८ सय ७८ छ । कटहरी गाउँपालिकामा भने २३ हजार १ सय २६ मतदाता छन् । विराटनगर महानगरपालिकाको ६ वटा वडा रहेको यस क्षेत्रमा मतदाता संख्या ४१ हजार ४७ छ ।

मंसिर १४, २०७४ मा प्रकाशित
प्रतिक्रिया दिनुहोस्