रौतहट जिल्लाको निर्वाचन क्षेत्र नं ३ अन्तर्गत मौलापुर नगरपालिका, २ चिरचिरीयामा चुनावी घरदैलोको क्रममा पुगेका सो क्षेत्रका उम्मेदवार बिना विभागिय मन्त्री प्रभु साहलाई सहयोग स्वरुप रकम दिँदै स्थानीय एक युवक । तस्विरः रासस

रौतहट-धेरै ठाउँको निर्वाचनमा उम्मेदवारले मतदातालाई रकम बाँडेको चर्चा भइरहँदा रौतहट प्रतिनिधिसभा क्षेत्र नं ३ मा भने ठीक उल्टो मतदाताले उम्मेदवारलाई पैसा दिएको पाइएको छ ।

जिल्लाको मौलापुर नगरपालिकाको चिरचिरिया, भरहरी, नवलपुरलगायतका क्षेत्रमा घरदैलाको क्रममा पुगेका उम्मेदवारलाई मतदाताले टीका लगाएर आशिर्वाद दिँदै सहयोग रकम दिने गरेका छन् । कतिपय मतदाताले उम्मेदवारलाई पैसाकै माला लगाइदिने गरेका छन् ।

मतदाताले रकम मात्रै होइन लड्डु, मिठाई, जुस जस्ता खाद्यपदार्थ उम्मेदवार र प्रचारटोलीलाई खुवाउँछन् । प्रचारको क्रममा मतदताले दिने लड्डु, मिठाइ खाँदा दिनभरी पेट खाली हुन नपाउने निर्वाचन प्रचारप्रसारमा संलग्न सदस्यहरू बताउँछन् ।

सो क्षेत्रमा प्रचारप्रसारमा नेकपा (एमाले) र माओवादी केन्द्रका साझा उम्मेदवार बन्नुभएका विनाविभागीय मन्त्री प्रभु साहलाई घरदैलोको क्रममा मतदाताले रकम दिएपछि सुरुका दिनमा केही अनौठो र असहज लाग्यो ।

सुरुवातमा पैसा लिन आनाकानी गर्दा मतदाता खिन्नभएको र रिसाएको पाएपछि उनीहरूलाई खुसी पार्नकै लागि भएपनि उम्मेदवार साहले रकम लिन थाले।

मन्त्री साहले भने, ‘मतदाताले टीका लगाइदिँदै आशिर्वाद दिएर हातमा प्रसाद भन्दै रकम थमाई दिन्छन्। नलिउँ भने रिसाउछन्। त्यसैले राख्‍न थाले ।’यसलाई मतदाताले आफूप्रति देखाएको माया र सद्‌भावको रुपमा आफूले लिएको उनको भनाइ छ ।

उम्मेदवारलाई थोरै भएपनि सहयोग होस् भनेर राजी खुशी साथ आफूहरूले रकम दिएका स्थानीय बताउँछन् । स्थानीय रामपृत साहले आफूकहाँ आउनेलाई रित्तो हात फर्काउनु हुन्‍न भन्‍ने गाउँको चलन रहेकाले स्थानीयवासीले सहयोग गरेको बताए।

मतदाताहरूले रु १०/२० देखि रु एक हजारसम्म पनि दिने गरेका छन् । मन्त्री साहका सहयोगी बालकृष्ण सापकोटाले चिरचिरिया गाउँमा मात्रै स्थानीयले दिएको रकम जोड्दा रु ५० हजार पुगेको जानकारी दिए।

माओवादी केन्द्रका उम्मेदवार साह मात्रै होइन सोही क्षेत्रबाट नेपाली काँग्रेसका उम्मेदवार सुनिलकुमार यादव र राष्ट्रिय जनता पार्टी (राजपा) का उम्मेदवार ओमप्रकाश साहको पनि अनुभव त्यस्तै छ ।

काँग्रेस उम्मेदवार यादवले पनि घरदैलोको क्रममा मतदाताले आफूलाई टीका लगाएपछि रकम दिएको बताए।

यो क्षेत्रमा माओवादी केन्द्रका साह, काँग्रेसका यादव र फोरम–राजपा गठबन्धनबाट जयसवाल, मजदुर किसान पार्टीबाट विनोदकुमार साह,, राष्ट्रिय जनमोर्चाबाट सोनाही महतोलगायत प्रतिस्पर्धामा हुनुहुन्छ ।

काँग्रेस, माओवादी केन्द्र र राजपाका उम्मेदवार तीनैजना उम्मेदवारले आफ्नो जित निश्चित रहेको दाबी गरे। निर्वाचन क्षेत्र पुर्नसंरचनाको क्रममा यसअघि क्षेत्र नं ३ र ५ रहेका अधिकांश क्षेत्रलाई ३ नम्बर क्षेत्र समेटिएको छ । क्षेत्र नं ३ बाट वि.स. २०७० को संविधानसभामा निर्वाचित साह र क्षेत्र नं ५ बाट निर्वाचित यादवबीच मुख्य प्रतिस्पर्धा देखिन्छ ।

दुई पटक लगातार यो क्षेत्रबाट जित्दै आउनुभएका साहले स्थानीय तहमा वामगठबन्धनले पाएको मत काँग्रेस, राजपा र फोरम तीनवटै पार्टीको भन्दा बढी रहेकोले आफूले सहजै जित्ने बताए।

साह भन्छन्, ‘क्षेत्रबाट निर्वाचित भएपछि मैले गरेका विकास निर्माण जिल्लाकै नमुना विकासको रुपमा जनताले लिएका छन् । मेरो कामका आधारमा जिल्लामा अरु क्षेत्रका मतदाताले समेत विकासप्रेमी नेताको रुपमा चिन्छन् ।’

काँग्रेस उम्मेदवार यादवले यो क्षेत्रको विकास, समृद्धिका लागि तथा मधेसीको माग सम्वोधन र प्रजातन्त्रको रक्षाका लागि मतदाताले आफूलाई नै निर्वाचित गर्नेमा विश्वस्त रहेको बताए ।सो क्षेत्रमा राजनीतिक दलको आस्थाका साथै जातिगत आस्थाका आधारमा समेत मतदान हुने भएकाले यादव समुदायको धेरै मत तान्न सकेमा जित्न सहज हुने काँग्रेस उम्मेदवार यादवको आशा छ ।

राजपाका उम्मेदवार जयसवाल पनि आफ्नो जित निश्चित रहेको बताउँदै अरु दल मधेस विरोधी भएकाले राजपा–फोरम गठबन्धलाई नै मधेसी जनताले निर्वाचित गर्ने बताउनुहन्छ । यो क्षेत्रमा ८३ हजार ५४६ मतदाता रहेका छन् । किरण भट्टराई/रासस

मंसिर १९, २०७४ मा प्रकाशित
प्रतिक्रिया दिनुहोस्