‘नेताहरुको सम्मानजनक व्यवस्थापन गर्न’ दुई बाम दलबीच गृहकार्य
काठमाडौँ- निर्वाचनमा अद्भूत सफलता हाल पारेको बाम गठबन्धनका दुई घटकहरु एमाले र माओवादीबीच दुवै दलका नेताको सम्मानजनक व्यवस्थापन हुने गरी एकताको गृहकार्य भइरहेको एक नेताले जानकारी दिएका छन्।
रिपोर्टर्स क्लबले बिहीबार आयोजना गरेको अन्तर्क्रियामा माओवादी नेता दीनानाथ शर्माले दुई दलबीच बीच चाँडै एकता प्रक्रिया सुरु हुनेसमेत जानकारी दिए।
नेता शर्माले पार्टी एकता र सरकार निर्माण प्रक्रिया सँगसँगै अगाडि बढ्ने उल्लेख गर्दै भने, ‘पार्टी एकताका लागि काम भइरहेको छ, अहिले साझा विधान ल्याउनका लागि कार्य चलिरहेकाले एकताका लागि ठूलो दबाब छ, हामी विचलित हुँदैनौँ।’
निर्वाचनमा जनताले वाम गठबन्धनलाई बहुमत दिएर मुलुकलाई स्थिरतातर्फ लैजान चाहेकाले अब सरकार र प्रतिपक्षी दल मिलेर देशलाई समृद्धि बनाउनका लागि काम गर्नुपर्ने पनि उनले बताए।
खानेपानी तथा सरसफाइमन्त्री एवं नेपाली काँग्रेसका केन्द्रीय सदस्य महेन्द्र यादवले काँग्रेसले अब प्रतिपक्षमा बसेर जनताको सेवा गर्ने जनादेशलाई कार्यान्वयन गर्ने बताउँदै बाहिर चर्चा भएजस्तो कुनै विवाद र मतभेद पार्टीभित्र नरहेको बताए। पार्टी सभापति शेरबहादुर देउवाको विकल्प नरहेको पनि उनले बताए।
संघीय समाजवादी फोरम नेपालका सहअध्यक्ष राजेन्द्र श्रेष्ठले वाम गठबन्धनले लिने नीतिका आधारमा आफ्नो दलले सहयोग गर्ने वा नगर्ने निर्णय लिइने बताउँदैे संविधान संशोधनमा सकारात्मक भए आफ्नो दलले अब बन्ने सरकारसँग सहकार्य गर्न सक्ने धारणा व्यक्त गरे।
प्रदेश नं २ मा आफ्नो पार्टी ठूलो दल भएकाले मुख्य मन्त्रीमा आफ्नो दलको दाबी रहने पनि उनले बताए।