आज नेपाल र मलेसिया भिड्दै

काठमाडौं- थाइल्यान्डमा जारी एसिसी यु–१६ इस्टर्न रिजन च्याम्पियनसिपको सेमिफाइनलमा नेपालले शनिबार मलेसियाको सामना गर्दै छ। थाइल्यान्डको टीसिजी मैदानमा हुने यस खेलमा जित हात पार्दै नेपाल फाइनल पुग्ने प्रयासमा छ।

नेपालले समूहगत चरणमा तीनवटै खेलमा शानदार जित हात पारेको थियो। यता मलेसिया भने समूह बीको उपविजेता बन्दै सेमिफाइनल पुगेको हो। उसले समूहगत चरणमा सिंगापुरसँग हार ब्यहोरेको थियो भने भुटान र चीनलाई हराएको थियो।

नेपाल यस प्रतियोगितामा बेजोड देखिएको छ। समूहगत चरणको अन्तिम खेलमा नेपालले म्यानमारलाई ३ सय ५० रनको लक्ष्य दिएको थियो भने विपक्षी टोलीलाई १३ रनमा अलआउट गरेको थियो। त्यसअघि पहिलो खेलमा थाइल्यान्डलाई १ सय ३३ रनले हराएको नेपालले दोस्रो खेलमा हङकङलाई चार विकेटले पराजित गरेको थियो।

एसिसीले यसअघि आयोजना गरेको एसिसी यु १६ प्रिमियर क्रिकेटमा नेपाल विजेता बनेको थियो जुन एसियाका एसोसिएट टोली स्तरको प्रतियोगिता थियो। तर यसपटकदेखि एसिसीले एसियाका एसोसिएट टोलीलाई भौगोलिक रुपमा विभाजन गरी इस्टर्न रिजन र वेस्टर्न रिजन च्याम्पियनसिपका रुपमा प्रतियोगिता आयोजना गर्न थालेको छ। नेपालले हालसम्म एसिसीले आयोजना गर्ने एसोसिएट मात्र सम्मिलित सबै स्तरका (उमेर र सिनियर)प्रतियोगिताको उपाधि जितेको छ।

पुस १, २०७४ मा प्रकाशित
प्रतिक्रिया दिनुहोस्