ओलीले दिए राजेश हमाललाई सुझाव- देश बनाउन पनि लाग्नोस्

भक्तपुर- प्रत्यक्षतर्फ दुई तिहाइ स्थानमा विजय हासिल गरेको बाम गठबन्धनका प्रमुख नेता तथा एमाले अध्यक्ष केपी शर्मा ओलीलाई बधाई दिन शनिबार नायक राजेश हमाल बालकोट पुगेका छन्। बधाई तथा शुभकामना ओली निवास पुगेका नायक हमालसँग अध्यक्ष ओलीले राष्ट्रियताको अडानले आम नेपालीलाई उत्साहित बनाउँदै आफूलाई दिएको जिम्मेवारी पूरा गर्ने बताए। देश र जनताले आफूलाई गरेको विश्वास र दिएको जिम्मेवारीबाट विमुख नहुनेसमेत ओलीले बताए।

गफगाफका क्रममा अध्यक्ष ओलीले चलचित्र नायकहरुले चलचित्रको अभिनयमा मात्र सीमित नभई देश बनाउन पनि भूमिका निर्वाह गर्नुपर्ने नायक हमाललाई सुझाव दिए।

ओलीले भने, ‘जनता र देशले मलाई जुन विश्वास र जिम्मेवारी दिएका छन् त्यसलाई म कुशलतापूर्व निर्वाह गर्नेछु, देश र जनताका निम्ति मैले निर्वाह गरेको भूमिकाबाट कसैलाई पनि पछुतो हुने छैन।’

नायक हमालले आगामी सरकारको नेतृत्व गरेर देशलाई स्थिरता, शान्ति र विकासको महायात्रामा अगाडि बढाउनु पर्ने भन्दै शुभकामना दिए। देशका लागि आवश्यक पर्दा आफू जुनसुकै सहयोग गर्न तयार रहेको हमालले बताए। (रासस)

पुस २, २०७४ मा प्रकाशित
प्रतिक्रिया दिनुहोस्