घटनास्थलको पाँच सय मिटर वरिपरि खाली

काठमाडौं-विरगन्ज महानगरपालिकाको वडा नम्बर १७ गण्डक नहर छेउमा रहेको सुपर ग्याँस कम्पनीमा लागिरहेको आगलागीको ५ सय मिटर वरिपरि खाली गरिएको छ।

संघिय प्रहरी इकाई नारायणीका एसएसपी सुर्य उपाध्यायले थप सम्भावित दुर्घटनालाई ध्यानमा राखी घटनास्थलको पाँच सय मिटर वरपर क्षेत्र खाली गरिएको जानकारी दिए। ‘आगो भिषणरुपमा लागिरहेको छ।

अहिलेसम्म सिलिन्डर मात्र पड्कीएको अनुमान गरेका छौं । तर त्यहाँ तीन वटा ग्याँस बुलेट पनि रहेको जानकारी पाएकाले थप दुर्घटनाको सम्भावना पनि छ । त्यसैले सुरक्षाकर्मी समेत पाँच सय मिटर दुरीमा मात्र छन्’,एसएसपी उपाध्यायले भने।

प्रहरीका अनुसार अझै ८/१० घन्टा त्यस क्षेत्रमा प्रवेश गर्ने सम्भावना छैन । ‘ प्राविधिकले बताए अनुसार आगलागी भईरहेको स्थानमा अझै आठ १० घन्टा प्रवेश गर्न सकिँदैन। त्यसैले अहिले तत्काल केही भन्न सकिँदैन’ एसएसपी उपाध्यायले भने।

बुधबार बिहान सात ४० बाट सुरु भएको आगलागी नियन्त्रणमा गएको विरगन्ज महानगरपालिकाको दमकलका दुई कर्मचारीको निधन भइसकेको छ । मृत्यु हुनेमा यादब अधिकारी र मधुसुदन मिश्र छन्। एसएसपी उपाध्यायले आगोलाग्ने बित्तिकै त्यहाँ रहेका मानिसको भाग दौड मच्चिएको बताए।

‘अहिलेसम्म दुई जनामात्र हराईरहेको जानकारी पाएकाले शव उनीहरुकै भएको हाम्रो आशंका छ । तर आगलागी हुँदा त्यहाँ कति थिए भन्ने यकिन साथ भन्न सक्ने अवस्था छैन। त्यसैले मानविय क्षतीको विषयमा पनि तत्काल यकिनसाथ भन्न गाह्रो छ।’, उपाध्यायले भने।

आगलागीमा घाइते भएका दमकलका दुई कर्मचारीलाई उपचारका लागि काठमाडौं ल्याईएको छ । प्रहरीले प्रारम्भिक अनुसन्धानमा बुलेटबाट ग्याँस भर्नेक्रममा आगलागी सुरु भएको अनुमान गरेको छ।

पुस ५, २०७४ मा प्रकाशित
प्रतिक्रिया दिनुहोस्