भैरहवाको लगातार दोस्रो जित

काठमाडौं-एभरेस्ट प्रिमियर लिग (ईपिएल) क्रिकेटमा भैरहवा ग्लाडियटर्सले लगातार दोस्रो जित हात पारेको छ।

बिहीबार भएको पहिलो खेलमा भैरहवाले ललितपुर प्याट्रियट्सलाई चार विकेटले हराएको छ । रोमान्चक खेलमा भैरहवाले एक सय ४२ रनको लक्ष्य अन्तिम बलसम्म खेलेर पुरा गर्‍यो ।

भैरहवाको पालीमा पुनित विष्टले ५०, रोहित कुमारले अविजित ३१ र आरिफ शेखले २७ रन बनाए ।

अन्तिम बलमा एक रन आवश्यक भएका बेला कृष्ण कार्कीले चौका प्रहार गरेका थिए । उनको सामना गरेको त्यो पहिलो बल थियो।

४९ रन जोड्दा चार विकेट गुमाएको भैरहवाले पाँचौं विकेटका लागि ५९ र छैटौं विकेटका लागि ३३ रनको साझेदारी गरेको थियो ।

पहिला ब्याटिङ गरेको ललितपुरले निर्धारित २० ओभरमा नौ विकेट गुमाएर एक सय ४९ रन जोडेको थियो।

ललितपुरको पालीमा योगेश नागरले ५४ र कप्तान ज्ञानेन्द्र मल्लले ४२ रनको योगदान गरे । जयकिशन कोल्सवालाले १४ रन बनाए।

ललितपुरका अन्य ब्याट्सम्यानले दोहोरो अंकमा रन जोड्न सकेनन् । नागरले ३३ बलमा एक छक्का र सात चौका प्रहार गरे । मल्लले २९ बलमा तीन छक्का र दुई चौका हिर्काए ।

भैरहवाका दिपेश श्रेष्ठले तीन तथा आरिफ शेख र पुनित मिश्राले दुई दुई विकेट लिए । शरद भेषावकरले पनि एक विकेट हात पारे ।

भैरहवाले आफ्नो पहिलो खेलमा बुधबार काठमाडौं किंग्स इलेभेनलाई हराएको थियो । दुई खेलबाट विराटनगर वारियर्स र भैरहवाको समान चार अंक छ।

ज्ञानेन्द्र मल्लको कप्तानीमा रहेको ललितपुरले तीन खेलबाट दुई अंक जोडेको छ । ललितपुरले लगातार दोस्रो हार ब्यहोरेको हो।

बिहीबार हुने दोस्रो खेलमा चितवन टाइगर्स र काठमाडौंबीच प्रतिस्पर्धा हुने छ ।

यो पनि हेर्नुहोस्:

पारसको टोलीको दोस्रो जित

 

पुस ६, २०७४ मा प्रकाशित
प्रतिक्रिया दिनुहोस्