फाइल फोटो

काठमाडौं- नेकपा एमालेका अध्‍यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’बीच ओली निवास बालकोटमा करिब डेढ घन्टा भेटघाट भएको छ।

निर्वाचनमा बाम गठबन्धनको अभूतपूर्व विजयपछि ओली-दाहाल पहिलोपटक भेटेका हुन्।

दुई शीर्ष नेतृत्वबीच नयाँ सरकार निर्माणका लागि देउवा सरकारले मार्ग प्रसस्त गर्नुपर्ने, राष्ट्रियसभामा गठनका लागि निर्वाचन आयोगलाई तत्काल समानुपातिक सूची सार्वजनिक गर्न आग्रह गरिने र पार्टी समायोजन समितिको बैठक चाँडै बस्ने निर्णय भएको छ।

‘पार्टी समायोजन समितिको बैठक बिहीबार वा शुक्रबार बस्ने सहमति दुई शीर्ष नेतृत्वबीच भएको छ,’ माओवादी केन्द्रका अध्यक्ष दाहालका स्वकीय सचिव मनहरि तिमिल्सिनाले देशसञ्चारसँग भने।

ओली र दाहालले केही बेर बालकोट निवासको छतमा घाम तापेर कुराकानी गरेका थिए। ओभरकोट र कालो भादगाउँले टोपीमा बालकोट पुगेका दाहाललाई गमक्क स्वीटर र तेह्रथुमे ढाकाको टोपी लगाएका ओलीले स्वागत गरेका थिए।

यो पनि हेर्नुहोस्:

बालकोटमा भेट्दैछन् ओली-दाहाल

पुस १२, २०७४ मा प्रकाशित
प्रतिक्रिया दिनुहोस्