तस्बिर : सलिम अन्सारीको फेसबुकबाट

विराटनगर –विराटनगरमा आयोजित कोसेली महोत्सवको दोश्रो संस्करणमा एक करोड ५० लाख रुपैयाँ भन्दा बढीको कारोबार भएको उद्योग संगठन मोरङको महिला उद्यम समितिले जनाएकोछ ।

गत शुक्रबारदेखि मंगलबारसम्म सञ्चालित उक्त महोत्सवमा कृषि, पर्यटन तथा औद्योगिक क्षेत्रलाई समेटिएको थियो । उक्त उद्यम समितिसँगै नेपाल युवा उद्यमी मञ्चले संयुक्त रुपमा महोत्सवको आयोजना गरेको हो ।

पूर्वको इलामदेखि जुम्लासम्मका उत्पादनलाई महोत्सवमा समेटिएको उद्यम समिति सल्लाहकार शिवा उपाध्यायले जानकारी दिइन् ।

‘महोत्सवले ठिकै प्रभाव छाड्ला भन्ने लागेको थियो, तर निकै राम्रो कारोबार गरेको छ’ उनी भन्छिन् । घरेलु महासंघ महिला उद्यम समिति सभापति समेत रहेकी उपाध्यायले यसप्रकारको कार्यक्रमले आफूलाई उत्साहित बनाएको बताइन् ।

महोत्सवमा १ सय २ वटा स्टलमा इलामको हरियो पत्ति चिया, अर्थोडोक्स चियादेखि जुम्लाको स्याउसम्मले प्राथमिकता पाएको थियो ।

त्यसैगरी अल्लोको कपडा, भुइँ स्याउ, हस्तकला, माटोबाट बनेका विभिन्न सामग्री, फलफूल तथा सब्जी, अगरबत्ती, खाद्यान्न तथा कस्मेटिक्सका सामग्रीले उल्लेख्य कारोबार गरेको बताइएकोछ । त्यसैगरी इलामको ध्यू, चिज, जाडोको कपडाले राम्रो स्थान पाएको थियो ।

पूर्वका विभिन्न स्थानबाट करिब ५० हजार बढी अवलोकनकर्ता महोत्सवमा सहभागिता जनाएको आयोजकको दाबी रहेकोछ ।

 

माघ १७, २०७४ मा प्रकाशित
प्रतिक्रिया दिनुहोस्