पहिलो पेनाल्टीमा चुके, अर्को पेनाल्टीमा केनको गोल

इंग्लिस प्रिमियर लिग फुटबल अन्तर्गत आइतबार राति भएको खेलमा टोटनह्यामले लिभरपुलसँग २–२ को बराबरी खेलेको छ ।

अवे मैदानमा भएको खेलमा माउरिसिओ पोकेटिनोको टिम टोटनह्याम पहिलो हाफमा पछि परेको थियो । तेस्रो मिनेटमा नै मोहम्मद सालहले जर्गेन क्लोप्पको टिम लिभरपुलका लागि गोल गर्दै सुरुवाति अग्रता दिलाए ।

८० औँ मिनेटमा भिक्टर वानयामाले टोटनह्यामका लागि बराबरी गोल फर्काए । त्यसपछि टोटनह्यामले पेनाल्टीको अवसर पाएको थियो ।

तर त्यसमा ह्यारी केन चुके, गोल गर्न सकेनन् । उनले प्रिमियर लिगमा आफ्नो एक सयौँ खेलमा पाएको पेनाल्टीमा पनि गोल गर्न सकेनन् ।

त्यसपछि इन्जुरी समयको पहिलो मिनेटमा सालहले व्यक्तिगत दोस्रो गोल गर्दै घरेलु टोली लिभरपुललाई जित नजिक लगे । तर इन्जुरी समयको पाँचौँ मिनेटमा टोटनह्यामले फेरि पेनाल्टी पायो ।

त्यसअघिको पेनाल्टीमा चुकेका केनले यसपटक भने गोल गरे । टोटनह्याम हारबाट जोगियो, महत्वपूर्ण एक अंक जोड्न सफल भयो ।

बराबरी पछि २६ खेलबाट ५१ अंकसहित लिभरपुल तेस्रो स्थानमा कायम छ । पाँचौँ स्थानको टोटनह्यामको २६ खेलबाट ४९ अंक भएको छ । राति नै भएको अर्को खेलमा क्रिष्टल प्यालेस र न्युक्यासलले १–१ को बराबरी खेल्दै अंक बाँडेका छन् ।

माघ २२, २०७४ मा प्रकाशित
प्रतिक्रिया दिनुहोस्