रोनाल्डोको ह्याट्रिक, रियल मड्रिडको प्रभावशाली जित

स्पेनिस ला लिगा अन्तर्गत शनिबार राति भएको खेलमा रियल मड्रिडले शानदार जित दर्ता गरेको छ । स्टार स्ट्राइकर क्रिष्टियानो रोनाल्डोको ह्याट्रिकको मद्दतमा घरेलु मैदानमा भएको खेलमा रियल मड्रिडले रियल सोसिडाडलाई ५–२ ले हराएको हो ।

रियलका लागि रोनाल्डोको ह्याट्रिकसँगै लुकास वाज्क्वेज र टोनी क्रुसले एक एक गोल गरे । रियल सोडिसाडाडका लागि जोन बाटिस्टा र एसर इलारमेन्डीले एक एक गोल गरे ।

खेलको पहिलो मिनेटमा नै वाज्क्वेजको गोलबाट रियल मड्रिडले सुरुवाति अग्रता लिएको थियो । यस्तै रोनाल्डोले २७ औँ मिनेटमा व्यक्तिगत पहिलो गोल गर्दै अग्रता दोब्बर पारे ।

३४ औँ मिनेटमा क्रुस तथा ३७ औँ मिनेटमा रोनाल्डोले व्यक्तिगत दोस्रो गोल गरेपछि पहिलो हाफमा रियल मड्रिडले ४–० को अग्रता लियो । दोस्रो हाफमा रियल सोसिडाडले दुई गोल फर्कायो भने रियल मड्रिडले थप एक गोल गर्‍यो ।

७४ औँ मिनेटमा बाटिस्टाले सोसिडाडका लागि पहिलो गोल गरे । यस्तै रोनाल्डोले ८० औँ मिनेटमा गोल गर्दै ह्याट्रिक पूरा गरे । उनले यो सिजन ला लिगामा ११ गोल गरेका छन् । ८३ औँ मिनेटमा इलारमेन्डीले सोसिडाडका लागि गोल गरेपछि रियल मड्रिड ५–२ ले विजयी भयो ।

च्याम्पियन्स लिगमा राम्रो प्रदर्शन गरिरहेका रोनाल्डोले घरेलु लिगमा पनि आफ्नो लय समातेको देखिएको छ । जितपछि रियल मड्रिड तेस्रो स्थानमा उक्लिएको छ । उसको २२ खेलबाट ४२ अंक भएको छ ।

उ शीर्ष स्थानको बार्सिलोना भन्दा १६ अंकले पछि छ । यस्तै दोस्रो स्थानको एथ्लेटिको मड्रिडभन्दा १० अंकले पछि रहेको छ ।

शनिबार राति नै भएको खेलमा एन्टोनी ग्रिजम्यानले पहिलो मिनेटमा नै गरेको गोलको मद्दतमा एथ्लेटिको मड्रिडले मालागालाई १–० ले हरायो । उसको २३ खेलबाट ५२ अंक भएको छ । अरु खेलमा एलाभेसले भिल्लारियललाई २–१ तथा एइबरले लेगानेसलाई १–० ले हरायो ।

माघ २८, २०७४ मा प्रकाशित
प्रतिक्रिया दिनुहोस्