अमेरिकी चुनावमा रुसी दखल : १३ रुसी नागरिकमाथि आरोप दर्ता

अमेरिकामा सन् २०१६ मा भएको राष्ट्रपति चुनावमा दखल दिएको आरोपमा १३ जना रुसी नागरिकमाथि उजुरी दर्ता भएको छ । अमेरिकी संघीय जाँच आयोग (एफबिआई) ले राष्ट्रपति चुनावमा दखल दिन दिएको भन्दै १३ रुसी नागरिकमाथि आरोप दर्ता गरेको हो ।

उनीहरुमाथि गैरकानुनी रुपमा अमेरिकी चुनावमा हस्तक्षेपको प्रयास गरेको आरोप छ । तीनजनामाथि प्रविधिको प्रयोग गरेर छल गरेको तथा अरुकै पहिचान प्रयोग गरेको आरोप लगाइएको छ ।

यस्तै तीन रुसी कम्पनी पनि यो अपराधमा संलग्न रहेको एफबिआईको आरोप छ । अमेरिकी चुनावमा रुसी हस्तक्षेपका बारेमा अनुसन्धान गरिरहेका विशेष काउन्सिल रोबर्ट म्युलरले यस्तो आरोप तयार गरेका हुन् ।

पत्रकार सम्मेलनमा उप–महान्याधीवक्ता रोड रोसेन्स्टेनले कुनै पनि अमेरिकी नागरिक यसमा सामेल रहेको नदेखिएको बताए । यस्तै रुसी प्रयासले चुनावमा कुनै प्रभाव भने नपरेको उनले बताएका छन् ।

रुसी नागरिकले आफूलाई अमेरिकी नागरिक साबित गरेर बैंकमा खाता खोली राजनीतिक विज्ञापनका लागि हजारौँ डलर रकम खर्चेको आरोप पत्रमा उल्लेख गरिएको छ ।

यस्तै उनीहरुले अमेरिकामा राजनीतिक र्‍याली पनि गराएका थिए । उनीहरुले सन् २०१४ को सुरुदेखि नै अमेरिकी चुनावमा प्रभाव पार्नका लागि प्रयास सुरु गरेको उल्लेख गरिएको छ ।

राष्ट्रपति ट्रम्पले आफू चुनाव लड्ने निर्णय गर्नु पूर्वदेखि नै रुसी दखलको प्रयास सुरु भएकाले आफ्नो कुनै संलग्नता नरहेको बताएका छन् । यस्तै रुसले भने यो आरोपमा कुनै सत्यता नरहेको प्रतिक्रिया दिएको छ ।

फाल्गुन ५, २०७४ मा प्रकाशित
प्रतिक्रिया दिनुहोस्