गुण्डा नाइके मनोज पुनको अपराध : एकवर्षमा तीनजनाको हत्या

काठमाडौं – यो वर्ष (२०७४) मा दुईजनाको हत्या । त्यसअघि गएको वर्ष एकजनाको । सालका हिसाबले दुई भए पनि महिना गन्दा एक वर्ष पूरा पुग्दा तीनजनाको हत्या, संलग्न व्यक्ति मनोज पुन भनिने गुण्डा नाइके मनोजबहादुर बुढामगर ।

२०७३ असोज ४ मा युवा संघ रुपन्देहीका अध्यक्ष दुर्गा तिवारीको हत्या । गएको असोज २३ गते काठमाडौंको व्यस्तमै निर्माण व्यवसायी महासंघका अध्यक्ष शरदकुमार गौचन अनि गएको पुस २१ गते रुपन्देहीका व्यवसायी बलु पौडेलको हत्या ।

मनोज स‌ंगठित हत्याका नाइके मात्र थिएनन्, नेपालकाे आन्तरिक सुरक्षाकै सबैभन्दा ठूला थ्रेट थिए

सबैमा पुनको संलग्नता । २०७३ पुसदेखि २०७४ पुससम्ममा तीनजनाको हत्यामा संलग्न रहेका पुन फरार रहेका थिए ।

उनलाई पक्राउ गर्ने क्रममा बुधबार बिहान तीन बजे रुपन्देशीको देवदह नगरपालिका–४ भवानीपुरमा पुनले भाग्न खोजेर प्रहरीमाथि नै गोली चलाएपछि जवाफी कारवाहीमा मारिएको प्रहरीले जनाएको छ । उनीसँगै अर्का गुण्डा नाइके सोम आले पनि मारिएका छन् ।

को हुन् मनोज पुन ?

पुन रुपन्देही देवदहका बासिन्दा हुन् । उनी त्यहिँ बसेर गुण्डागर्दीको काम गर्दै आएका थिए । उनको अपराधको बाटोको सुरुवात २०६२–०६३ का आन्दोलनपछि भएको प्रहरी बताउँछ ।

उनले जिल्लामा हुने ठेक्कापट्टामा हस्तक्षेप गर्ने र आफूले भनेकालाई ठेक्कापार्न दबाब दिने गर्न थालेका थिए । भने अनुसार नभएमा अपहरण तथा हत्या गर्ने क्रम पनि सुरु गरेको प्रहरीले जनाएको छ ।

गुण्डा नाइके मनोज पुनसहित सोम आले प्रहरी इन्काउन्टरमा मारिए

उनी एकीकृत माओवादीको युवा संस्था वाइसिएलमा पनि संलग्न भए । उनी आफ्नो अपराधलाई राजनीतिको कलेबर दिएर छोप्नका लागि त्यता गएका हुन् ।

तर पछि उनी एमालेको वाइसिएल जस्तै संठगन युथ फोर्समा सामेल भए । त्यसको खोलमा पनि उनले अपराधलाई निरन्तरता दिएको बताइन्छ । उनको कर्तुत थाहा पाएपछि पार्टीले निकाल्यो । त्यसको जवाफ स्वरुप उनले दुर्गा तिवारीको हत्या गरे । जो युवा संघ रुपन्देहीका अध्यक्ष थिए ।

यो हत्याले उनलाई चर्चामा ल्यायो । रुपन्देहीका गुण्डानाइके, प्रहरीको सर्वाधिक खोजीको सूचिमा रहेको अपराधी बने । दुर्गा पौडेलपछि गौचन र बलुको हत्या गरेका उनी बुधबार बिहान प्रहरीको इन्काउन्टरमा मारिए ।

 

सम्बन्धित समाचार 

गुण्डा नाइके मनोज पुनसहित सोम आले प्रहरी इन्काउन्टरमा मारिए

मनोज स‌ंगठित हत्याका नाइके मात्र थिएनन्, नेपालकाे आन्तरिक सुरक्षाकै सबैभन्दा ठूला थ्रेट थिए

फाल्गुन ९, २०७४ मा प्रकाशित
प्रतिक्रिया दिनुहोस्