शिक्षकलाई बन्दुक दिने ट्रम्पको प्रस्ताव

अमेरिकी राष्ट्रपति डोनाल्ड ट्रम्पले विद्यालय क्षेत्रलाई बन्दुक निशेधित वा बन्दुक मुक्त क्षेत्र बनाउन नहुने र शिक्षकलाई बन्दुक दिने बताएका छन् ।

विद्यालयमा हुने गरेका गोलीकाण्ड सम्बन्धी राष्ट्रपति कार्यालय ह्वाइट हाउसमा भएको कार्यक्रममा राष्ट्रपति ट्रम्पले गोलीकाण्ड र त्यसबाट हुने हताहती रोक्नका लागि विद्यालय र त्यसआसपासको क्षेत्रलाई बन्दुक मुक्त क्षेत्र बनाउन नहुने बताएका हुन् ।

उनले शिक्षकहरुलाई बन्दुक दिनु पर्ने कुराको समर्थन गरेका छन् । बन्दुकसहितका शिक्षकले विद्यालयमा हुने आक्रमण तत्काल रोक्न सक्ने ट्रम्पको भनाई छ ।

फ्लोरिडाको स्कुलमा अन्धाधुन्ध गोली प्रहार, १७ जनाको मृत्यु

गएको हप्ता फ्लोरिडाको एक विद्यालयमा भएको अन्धाधुन्ध गोलीकाण्डमा १७ जनाको ज्यान गएको थियो । त्यो घटनाका पीडित तथा बाँच्न सफलहरुले राष्ट्रपति ट्रम्पलाई आउँदा दिनमा यस्तो घटना हुँदैन भन्ने सुनिश्चित गर्न आग्रह गर्न आयोजित कार्यक्रममा ट्रम्पले शिक्षकलाई बन्दुक दिने सुझाव दिएका हुन् ।

सत्तामा रहेको रिपब्लिकन पार्टीले बन्दुक किन्ने व्यक्तिको पृष्ठभूमिका बारेमा राम्रोसँग जाँच हुनु पर्ने कुराको समर्थन गरेको छ ।

यस्तै फ्लोरिडामा गोलीकाण्डका पीडित तथा स्थानीय बासिन्दाले त्यहाँका जनप्रतिनिधिलाई बन्दुक नियन्त्रण सम्बन्धी व्यवस्था लागु गर्नका लागि दबाब दिइरहेका बेला ट्रम्पले शिक्षकलाई बन्दुक दिने तथा विद्यालय र त्यस वरपरको क्षेत्रलाई बन्दुक मुक्त क्षेत्र बनाउन नहुने बताएका हुन् ।

अहिले विद्यालय तथा त्यस वरपरको क्षेत्र बन्दुक मुक्त बनाउनु पर्ने व्यवस्था छ ।

ट्रम्पले बन्दुक किन्ने व्यक्तिका बारेमा जाँच गर्ने तथा मानसिक स्वास्थ्यमा जोड दिने फ्लोरिडाको मेजररी स्टोनम्यान डगल विद्यालयका विद्यार्थी, शिक्षक तथा अभिभावकसँग बताएका छन् । अब पहिले जस्तो नहुने उनको दाबी छ ।

फाल्गुन १०, २०७४ मा प्रकाशित
प्रतिक्रिया दिनुहोस्