सिरिया युद्ध

पूर्वी गुटामा दुई हप्तामा १० प्रतिशत क्षेत्र सरकारी सेनाको नियन्त्रणमा

आक्रमणमा परि घाइते भएका पूर्वी गुटाका बासिन्दा । तस्बिर : एएफपी र गेट्टी इमेज

दुई हप्तादेखि बिद्रोही विरुद्ध कारवाही अभियान सुरु गरेको सिरियाली सरकार समर्थित सेनाले बिद्रोहीको कब्जामा रहेको पूर्वी गुटाको १० प्रतिशत क्षेत्र आफ्नो नियन्त्रणमा लिन सफल भएको छ । राजधानी दमासकस नजिक रहेको पूर्वी गुटा सन् २०१३ देखि बिद्रोहीको कब्जामा छ ।

दुई हप्तादेखि हवाई आक्रमण हुँदै आएको पूर्वी गुटामा शनिबारदेखि सरकारी सेनाले स्थल आक्रमणलाई तीव्रता दिएको छ । बिद्रोहीले पनि त्यसको प्रतिकार गरिरहेको मानवअधिकारवादी संस्था सिरियन अब्जरभेटरी फर ह्युमन राइट्सले जनाएको छ । पूर्वी गुटामा अहिले ३ लाख ९३ हजार नागरिक फसेका छन् ।

सिरियामा बिद्रोही विरुद्धको कारवाही अभियानमा रुसले साथ दिँदै आएको छ । पूर्वी गुटामा पनि रुसको साथमा सिरियाली सेनाले बिद्रोहीलाई निशाना बनाउन भन्दै आक्रमण सुरु गरेको हो ।

तर निशानामा बिद्रोही भनिए पनि मारमा सर्वसाधारण नागरिक परेका छन् । झण्डै दुई हप्तामा ६७४ जना भन्दा धेरैको ज्यान गएको छ । यसमा एक सय ५० भन्दा बढी बालबालिका छन् ।

पूर्वी गुटामा खाद्यान्नसहितका अत्यवाश्यक सामग्रीको अभाव छ ।

संयुक्त राष्ट्रसंघीय सुरक्षा परिषदले युद्ध विरामको प्रस्ताव गरे पनि त्यो लागु भएको छैन । सिरियालाई साथ दिँदै आएको रुसले अहिले पनि आक्रमणलाई निरन्तरता दिएको छ ।

सिरिया सरकारले गुटामा भइरहेको आक्रमण बिद्रोही लक्षित रहेको दाबी गरेको छ । तर मर्कामा सर्वसाधारण नागरिक परेका छन् ।
भोकमा ज्यान जोगाएका उनीहरु हवाई तथा रकेट आक्रमणमा आफूलाई बचाउन असफल छन् ।

राजधानी दमासकसको बाहिरी इलाकामा रहेको पूर्वी गुटामा ३ लाख ९३ हजार मानिस फसेका छन् । अहिले ती नागरिक रुसको सहयोगमा सरकारी सेनाले बम खसाल्न थालेपछि त्रासमा बाँच्न बाध्य छन् । सरकारी सेनाको आक्रमणमा धेरै बालबालिका चपेटामा परेका छन् । उपचारका लागि स्वास्थ्य संस्थाको पनि अभाव छ ।

संयुक्त राष्ट्रसंघले पूर्वी गुटाको अवस्था अति नै दयनिय भएकाले तत्काल सबै पक्षले मानवीयता देखाउनु पर्ने बताएको छ ।

संयुक्त राष्ट्रसंघका महासचिव एन्टोनियो गुटरेस्टले पूर्वी गुटाले अब पर्खिन नसक्ने भन्दै तत्काल युद्ध रोकेर सहयता सामग्री पठाउन तथा उद्धारको काम गर्नु पर्ने बताउँदै आएका छन् । तर पूर्वी गुटाको अवस्था फेरिएको छैन ।

फाल्गुन २०, २०७४ मा प्रकाशित
प्रतिक्रिया दिनुहोस्