धनकुटा महोत्सवमा कलाको झल्को

निजी क्षेत्रलाई लगानीका लागि प्रोत्साहन गर्ने मुख्यमन्त्री राईको भनाई

विराटनगर – निजी क्षेत्रलाई प्रदेशको विकास र सम्बृद्धिका लागि लगानी गर्न प्रोत्साहन गरिने प्रदेश नम्बर एकका मुख्यमन्त्री शेरधन राईले बताएका छन् ।

आइतबारदेखि धनकुटामा सुरु भएको प्रादेशिक, औद्योगिक, व्यापार तथा कृषि प्रदर्शनी एवं धनकुटा महोत्वसको उद्घाटनका क्रममा मुख्यमन्त्री राईले प्रदेशको सम्बृद्धिको लागि आउदो पाच वर्ष स्वर्णिम हुने बताए ।

मुख्यमन्त्री राईले भने, ‘धेरै क्षेत्रको सम्भावना बोकेको यस प्रदेशको विकासका लागि निजी क्षेत्रलाई सरकारले प्रोत्साहन गर्नेछ । देश संघीय संरचनामा गइसकेको र संविधान कार्यान्वयनको बाटोमा उन्मुख भइरहेको छ, त्यसैले पनि अबको लक्ष्य विकास नै हो ।’

उनले तीन तहको नागरिक सरकार देशमा बनिसकेको अवस्था र सिंगो देश विकास सम्बृद्धि र सम्पन्नता प्राप्त गर्ने ऐतिहासिक यात्रामा प्रवेश गरेको उल्लेख गरे ।

चौथो धनकुटा महोत्सवमा प्रदर्शनीतर्फ १ सय २५ त्यसैगरि २५ वटा विभिन्न खानाको परिकारको स्टल गरी कुल १ सय ५० वटा स्टल राखिएको छ ।

स्टलमा नेपाल एकीकृत व्यापार रणनीतिमा समावेश १९ प्रकारका बस्तु, औद्योगिक, व्यापारिक, हस्तकला, कृषि तथा जडिबुटी, घरेलु उद्योगवाट उत्पादित वस्तु तथा कलासंस्कृति झल्कने कार्यक्रम एवम् प्रदर्शनी रहेका छन् ।

महोत्सव करिब एक लाख आन्तरिक तथा बाह्य पर्यटकहरुले अवलोकन गर्ने र ३ करोड रुपैयाँ भन्दा बढीको आर्थिक कारोबार हुने आयोजकको अनुमान रहेको छ ।

उद्योग बाणिज्य संघ धनकुटाको आयोजनामा सुरु भएको कृषि, पर्यटन, स्वास्थ्य, स्वरोजगार, उद्योग र ब्यापार समुन्नत प्रदेश नम्बर एकको आर्थिक विकासको मुल आधार भन्ने नारासहितको महोत्वस फाल्गुन ३० गतेसम्म चल्नेछ ।

तस्बिर सौजन्य : सरस कट्टेल

फाल्गुन २१, २०७४ मा प्रकाशित
प्रतिक्रिया दिनुहोस्