तीन पाना लामो वक्तव्यमा भने, 'पराजुली साउन २१ गतेदेखि प्रधानन्यायाधीश होइनन्'

न्यायाधीश चोलेन्द्रशमशेरद्वारा प्रधान न्यायाधीश पराजुलीको इजलास बहिष्कार

काठमाडौं– चिकित्सक गोविन्द केसी र कान्तिपुरको अदालतको अवहेलना सम्बन्धी मुद्दामा सोमबार पनि सुनुवाइका लागि इजलासमा रहेका न्यायाधीश चोलेन्द्रशम्शेर जबराले इजलास नै बहिष्कार गरेका छन्।

अदालतको अवहेलना सम्बन्धी मुद्दामा सुनुवाइका लागि तोकिएको बृहत इजलासमा रहेका जबराले सोमबार इजलास बहिष्कार गरेका हुन्।

उनले तीन पाना लामो वक्तव्य इजलासबाटै जारी गर्दै प्रधानन्यायाधीश पराजुली साउन २१ गतेदेखि प्रधानन्यायाधीश नरहने उल्लेख गरेका हुन्। अन्य न्यायाधीशहरु इजलासमा नआएकै अवस्थामा चोलेन्द्रशमशेरले इजलास बहिष्कार गरेका हुन्।

‘गोपाल पराजुलीको नागरिकता सम्बन्धी प्रमाणले उहाँको अवधि गएको साउन २१ गतेदेखि नै सकिएको देखिएको छ। त्यसैले उहाँले तोकेको इजलासमा म बस्दिन, उहाँलाई प्रधानन्यायाधीश पनि मान्दिनँ,’ चोलेन्द्रशमशेर जबराले दिएको वक्तव्यमा उल्लेख छ।

म्याद सकिइसकेका प्रधानन्यायाधीश रहेको इजलासमा बहस गर्नुको औचित्य नरहेको उनको भनाइ छ।

यो मुद्दा आइतबारको वृहत इजलासमा ‘हेर्दाहेर्दै’ मा रोकिएको थियो । आइतबार केसीको मुद्दामा निवेदक पक्षको बहस सकिएको छ भने कान्तिपुरको बहस जारी रहेकै अवस्थामा ‘हेर्दाहेर्दै’ मा रोकिएको थियो ।

कान्तिपुर र गोविन्द केसीविरुद्धको अदालतको अवहेलना सम्बन्धी मुद्दा प्रधानन्यायाधीश गोपाल पराजुलीसहित सातजना न्यायाधीशको वृहत पूर्ण इजलाशमा पेशी तोकिएको थियो ।

दुवै मुद्दा अदालतकोे अवहेलनासम्बन्धी भएकाले एउटै इजलाशमा सुनुवाइ गर्ने तय भएको थियो । प्रधानन्यायाधीश गोपाल पराजुलीको पाँचवटा जन्म मितिसम्बन्धी समाचार कान्तिपुरले प्रकाशन गरेपछि अधिवक्ता तोयानाथ ढुंगानाले फागुन १४ र गोविन्द केसीविरुद्ध सर्वोच्च आफैँले पुस २५ गते अवहेलना मुद्दा दायर गरेको थियो ।

फाल्गुन २८, २०७४ मा प्रकाशित
प्रतिक्रिया दिनुहोस्