इरफान खानलाई दुर्लभ ट्युमर, कारण के र उपचार कस्तो ?

बलिवुड तथा हलिवुड चलचित्रका अभिनेता इरफान खानले आफ्नो रोगका बारेमा बताएका छन् ।

गएको दुई हप्ताअघि आफूलाई ‘दुर्लभ रोग’ लागेका बताएका इरफानले शुक्रबार आफूलाई दुर्लभ ट्युमर भएको बताएका हुन् । उनलाई न्युरोएन्डोक्राइन ट्युमर भएको हो । तर यसपटक उनले त्यसको अवस्था कस्तो रहेको बताएका छैनन् ।

उनले ट्वीट गरे ट्युमरका बारेमा जानकारी दिएका हुन् । उनले लेखेका छन्, ‘जीवनमा आउने अनपेक्षित बदलावले अघि बढ्न सिकाउँछ । मलाई अहिले न्युरोएन्डोक्राइन ट्युमर रहेको थाहा भएको छ ।’

उनले आफ्ना फ्यानलाई पिर गर्न भन्दा पनि आफ्ना लागि स्वास्थ्यको कामना गर्न आग्रह गरेका छन् । ५१ वर्षका खानले १०० भन्दा बढी चलचित्रमा अभिनय गरेका छन् । बलिवुडमा उनका पिकु, मक्बुल, हाँसिल, पान सिंह तोमरसहितका उत्कृष्ट चलचित्र छन् ।

यस्तै उनले लाइफ अफ पाइ, सलमडक मिलेनियर्स, द अमेजिङ स्पाइडर–म्यानसहितका हलिवुड चलचित्रमा पनि अभिनय गरेका छन् ।

इरफान खानलाई ‘दुर्लभ’ रोग, भने–चिन्ता नलिनु

उनी अन्तर्राष्ट्रिय स्तरमा राम्रो परिचय बनाएका भारतीय कलाकार हुन् । उनले बलिवुडसहित स्वतन्त्र हिन्दी चलचित्रमा पनि अभिनय गरेका छन् । उनले सन् २०१३ मा पान सिंह तोमरमा गरेको उत्कृष्ट अभिनयका लागि राष्ट्रिय चलचित्र अवार्ड जितेका थिए ।

न्युरोएन्डोक्राइन ट्युमरमा के हुन्छ ?

बेलायतको एनएचएसका अनुसार न्युरोएन्डोक्राइन ट्युमर त्यस्तो दुर्लभ प्रकारको ट्युमर हो, जुन शरीरका विभिन्न अंगमा फैलिन सक्छ ।

तर बिरामीको आँकडा हेर्दा यो ट्युमर विशेष गरी आन्द्रामा हुने गरेको पाइएको छ । यसको सबैभन्दा पहिलो असर ब्लड सेल्समा पर्छ, जसबाट ब्लड सेलमा हर्मोन रिलिज हन्छ । यो ट्युमर निकै सुस्त गतिमा बढ्ने गरेको पाइन्छ, तर सबै अवस्थामा त्यस्तै हुन्छ भन्ने छैन ।

यो ट्युमरको कारण अहिलेसम्म पत्ता लागेको छैन तर आनुवंशिक कारण पनि हुने गरेको पाइन्छ । यसको उपचार भनेको शल्याक्रिया गर्ने र हर्मोन कम रिलिज गराउने खालका औषधि खाने नै हो ।

चैत ३, २०७४ मा प्रकाशित
प्रतिक्रिया दिनुहोस्