सभामुख महराले भने, ‘अब म कुन दल भूमिकामा छैन, समान व्‍यवहार गर्नेछु’

सम्माननीय सभामुख कृष्णबहादुर महरालाई सम्मान गर्दै घोराही उपमहानगरपालिकाका प्रमुख नरुलाल चौधरी र उपप्रमुख सीता सिग्देल न्यौपानेलगायत।तस्बिरः दशरथ घिमिरे/देश सञ्‍चार

दाङ-प्रतिनिधि सभाका सभामुख कृष्णबहादुर महराले  सार्वजनिक महत्वका कानुनहरु बनाउने कामलाई पहिलो प्राथमिकता दिइएको बताए।

‘यो समयमा धेरै काम गर्नुपर्ने छ, जरुरी महत्वका कानुनहरु बनाउने काम अघि बढाउनुपर्ने छ ’महराले भने-‘यो वर्षलाई नयाँ कानुनहरु बनाउने वर्षको रुपमा लिएका छौं।’

घोराही उपमहानगरपालिकाले मंगलबार आफ्नै कार्यकक्षमा आयोजना गरेको स्वागत तथा बधाई कार्यक्रममा बोल्दै सभामुख महराले वैज्ञानिक ढंगको कानुन निर्माणमा आफू जिम्मेवार रहेको बताएका हुन्।

स्थानीय तहलाई सहज ढंगले अघि बढ्ने गरी प्रदेश र संघले तयार गर्नुपर्ने कानुनहरु निर्माणमा प्राथमिकता दिने गरी काम गर्दै यो बर्षलाई नयाँ कानुनको अभ्यासका रुपमा लिने र बैशाख १५ पछि बजेटसँगै अन्य ऐन कानुनहरु निर्माणमा केन्द्रित हुने बताए।

दाङ क्षेत्र नं. २ बाट प्रतिनिधि सभामा निर्वाचित सभामुख महराले दङाली जनताका लागि आफ्नो जनप्रतिनिधि भूमिकामा कतै पनि कमी हुन नदिने बताए।  फेरिएको जिम्मेवारीसँगै सभामुखको हैसियतले अब आफू साझा व्यक्तित्व भएको भन्दै उनले व्यवहारबाटै साझा व्यक्तित्व देखाउने बताए।

‘अब म कुनै दलको भूमिकामा छैन’, सभामुख महराले भने, ‘म सबैलाई समान दृष्टिकोणबाट व्यवहार गर्नेछु, कुनै दलविशेषका पक्षमा गतिविधि हुने छैनन् ।’
सभामुख महराले सांसदमा निर्वाचित हुनुपूर्ब घोषणा गरेका प्रतिबद्धताहरु पूरा गर्न आफूले निरन्तर पहल गरिरहेको बताए।

उनले समग्र दाङको विकासमा आफूले गरेका प्रतिबद्धताहरु पूरा गर्नका लागि निरन्तर पहल गरिरहेको बताए। उनले भने, ‘विकास निर्माणका जरुरी आवश्यकताहरुलाई प्राथमिकताका आधारमा एकीकृत गरेर स्थानीय तहबाट योजनाहरु थप्‍न लगाउँछु।’

कार्यक्रममा घोराही उपमहानगरपालिकाका प्रमुख नरुलाल चौधरीले सभामुख महरालाई खादा र सम्मानपत्रसहित सम्मान गरेका थिए। यसका साथै दाङ जिल्ला उद्योग वाणिज्य संघले पनि घोराहीमा छुट्टै कार्यक्रमको आयोजना गरी सम्माननीय सभामुख कृष्णबहादुर महरालाई स्वागत सम्मान गरेको छ।

चैत ६, २०७४ मा प्रकाशित
प्रतिक्रिया दिनुहोस्