जनकपुरका सडक मर्मत नगरे आन्दोलनमा जाने चेतावनी

ज्ञापनपत्र बुझ्दै मेयर साह। तस्बिर: देशसञ्चार

जनकपुरधाम-  जनकपुरमा सडक निर्माण कार्यमा ढिलाइ हुँदा उद्योगी व्यवसायीहरु मर्कामा परेको र घाटा व्यहोर्न बाध्य भएकाले यसको निराकरण गर्न उद्योग वाणिज्य संघ जनकपुरले आग्रह गरेको छ।

जनकपुर उद्योग वाण्ज्यि संघ जनकपुरले उपमहानगरपालिकालाई ज्ञापनपत्र बुझाउँदै सडक निमार्ण कार्यले भएको समस्या समयमै नरोके आन्दोलन गर्न बाध्य हुने चेतावनी समेत दिएको छ।

विज्ञापन

संघले मेयर लालकिशोर साहलाई ज्ञापनपत्र बुझाउँदै निर्माण कार्यमा भइरहेको ढिलाइ र धुलोको समस्या समयमै निराकरण नगरिए आन्दोलनमा उत्रन बाध्य हुने जनाएको हो।

पर्यटकीय र धार्मिक दृष्टिकोणले ऐतिहासिक नगरी जनकपुरधाम प्रदेश २ को अस्थायी राजधानी घोषणा भइसकेकाले निर्माण कार्यमा काँधमा काँध मिलाई साथ चल्न तयार रहेको वाणिज्य संघले बताएको छ।

निर्माणको समयमा उत्पन्न समस्यालाई उपमहानगरपालिकाले नजरअन्दाज गरे वाणिज्य संघ चुप लागेर नबस्ने र आन्दोलनमा जाने चेतावनीसमेत दिएको छ।

एडिबी परियोजना र एकीकृत शहरी विकास आयोजना अन्तर्गत भइरहेको सडक निर्माण कार्यमा शिवचौक, भानुचौकसहित जनकपुरका विभिन्न ठाउँका बाटोघाटोबाट निस्कने धुलोले स्वास्थ्यमा असर पर्ने हुँदा पानी छर्कन पनि आग्रह गरिएको छ।

ज्ञापनपत्र बुझ्दै मेयर साहले विकास निर्माणमा वाणिज्य संघले देखाएको गम्भीरतालाई सराहना गरे। जनसहभागिताको कमीले विकास निर्माण कार्यमा ढिलाइ भएको बताउँदै उनले आफूले पनि निर्माण कार्यलाई गम्भीरतासाथ लिएको उल्लेख गरे।

चैत्र ८, २०७४ मा प्रकाशित
प्रतिक्रिया दिनुहोस्