सुनसरी – सुनसरीको दुहबी नगरपालिका उपमेयर सुनिता दाहाल साहले वडा अध्यक्ष र सदस्यमाथि हातपात गरेकी छन् ।

स्थानीयस्तरका विवाद मिलाउने न्यायिक समितिको संयोजक समेत रहेकी उपमेयर साहले शुक्रबार दुहबी नगरपालिका वडा नम्बर ५ का अध्यक्ष तथा सदस्यलाई कुटपिट गरेकी हुन् ।

वडा नम्बर ५ मा रहेको सरस्वती उच्च मा.वि खेल मैदानको निर्माण सम्बन्धी अनुगमनका लागि नगरपालिका पुगेका वडा अध्यक्ष रमेश रौनियार र सदस्य कृष्ण तामाङमाथि नगरपालिका परिसरमै कुटपिट भएको हो ।

खेल मैदानको निर्माण कार्य सम्पन्न भइसकेको र अनुगमन गरी बजेट फर्छ्यौटको प्रक्रिया अघि बढाइदिन आग्रह गरेपछि दुवै पक्षबिच विवाद उत्पन्न भएको थियो । विवादले उग्ररुप लिँदै गर्दा उपमेयर साहले आफ्ना श्रीमान सुनिल साहलाई बोलाएर एकाएक कुटपिट गरेको वडा सदस्य तामाङले बताए ।

निर्माण सम्बन्धीको फाइल समेत उपमेयर साहले नियन्त्रणमा लिइ विकास निर्माणको कामलाई रोकेको अर्का पीडित वडा अध्यक्ष रमेश रौनियारले गुनासो गरे ।

घटना भएपछि आक्रोशित सर्वसाधरणले दुहबी नगरपालिका दिनभर घेराउ गरे त्यसैगरी घटनाको बिषयमा जानकारी दिँदै नगरपालिकाका मेयर बेद गच्छदारले उपमेयरको बचाउमा कुटपिट नभएको र सामान्य विवाद भएको उल्लेख गरे ।

तथापी उक्त घटनामा कुटपिट भएको भिडियो सार्वजनिक भएपछि मेयर गच्छदारले गल्ती स्वीकार गरे । उनले भने, ‘गल्ती भएको रहेछ, जनप्रतिनीधिले नै यसरी कुटपिट गर्नु असोभनिय पक्ष हो ।’

चैत १०, २०७४ मा प्रकाशित
प्रतिक्रिया दिनुहोस्