उपत्यकाबाट ११ मेट्रिक टन फोहर व्यवस्थापन

फाइल तस्बिर।

काठमाडौँ- उपत्यकाका नदी र चक्रपथ सफाइ गरी ११ मेट्रिक टन फोहर व्यवस्थापन गरियो । वाग्मती सफाइ महाअभियानको २५४औँ हप्तामा शनिबार पशुपति क्षेत्रस्थित गुह्येश्वरी मन्दिर अघिको नदी किनारमा सफाइ गरी तीन मेट्रिक टन फोहर व्यस्थापन गरियो।

सफाइमा अधिकार सम्पन्न वाग्मती सभ्यता एकीकृत विकास समिति, नेपाली सेना, नेपाल प्रहरी, सशस्त्र प्रहरी लगायत सामाजिक संस्थाको संस्थागत सहभागिता रहेको थियो।

सफाइमा अधिकार सम्पन्न वाग्मती समितिका अध्यक्ष नरेन्द्रराज बस्नेतलगायत अभियन्ताको सक्रियता रहेको अधिकार सम्पन्न वाग्मती समितिकी सञ्चालक सदस्य माला खरेलले जानकारी दिनुभयो । विसं २०७० जेठ ५ गते वाग्मती सफाइ महाअभियान शुरु भएको हो।

महाअभियानपछि उपत्यकाका नदी र चक्रपथका साथै देशका प्रमुख शहरका ४५ स्थानमा स्वतःस्फूर्तरुपमा सफाइ अभियान सुरु भएको छ। सफाइ महाअभियानले अटुट रुपमा २५४ हप्ता पार गरेको छ । शनिबार चाडपर्व परे पनि सफाइ अभियानलाई निरन्तरता दिइएको उनले सुनाए।

गुह्येश्वरीमाथिको वाग्मती सफाइको २१५औँ हप्तामा एभरेष्ट पेट्रोल पम्प मुनिको नदी क्षेत्रमा सफाइ गरी एक मेट्रिक टन फोहर व्यवस्थापन भयो। सफाइसँगै नदी किनारको बगैँचा पनि गोडमेल गरिएको पुडासैनी मैत्री समाजका अध्यक्ष उत्तम पुडासैनीले बताए।

वाग्मतीको पानी फोहर भई छोडिएका बाच्छा पानी खाएर मर्न थालेपछि समाजले धाराको पानीमा नून हालेर खुवाउने अभियानलाई पनि निरन्तरता दिएको छ। यो अभियानमा सहयोग गर्नेको संख्यासमेत बढिरहेको अभियानले जनाएको छ। यसअघि यस क्षेत्रमा फोहर पानीका कारण हुर्किएका माछा पनि मरेका थिए।

रुद्रमती सफाइको २०९औँ हप्तामा काठमाडौँ महानगरपालिका-३२ स्थित राममन्दिर परिसरमा जनचेतनामूलक सफाइ गरी तीन मेट्रिक टन फोहर व्यवस्थापन गरियो। मन्दिरमा रामनवमीका अवसरमा आइतबार विशेष मेला लाग्छ।

सफाइमा रुद्रमती समन्वय समितिका अध्यक्ष एवम् पूर्वप्रहरी अतिरिक्त महानिरीक्षक विज्ञानराज शर्मालगायत अभियन्ताको उपस्थिति थियो। सफाइमा रुद्रमती सरोकार समाज, वातावरण संरक्षण अभियान, प्रसिद्धि कला समूहलगायत संस्थाको सक्रियता रहेको अभियन्ता रोहित गिरीले जानकारी दिए।

विष्णुमती सफाइको १८०औँ हप्ताका अभियन्ता चक्रपथ सफाइको ५०औँ हप्ताको कार्यक्रममै सहभागी भएको अभियन्ता बिजेन्द्र लामाले जानकारी दिए। वाग्मतीको तिलगंगा क्षेत्र सफाइको १५९औँ हप्तामा जनचेतनामूलक सफाइ अभियान सञ्चालन गरिएको अभियन्ता आशा पाण्डेले बताए। नदीमा वाग्मती सौन्दर्यीकरणको कार्य भइरहेकाले जनचेतनामूलक अभियान सञ्चालन गरिएको उनले सुनाए।

मीनभवन क्षेत्रको आलोकनगर सफाइको ५०औँ हप्तामा आज त्यस क्षेत्रमा सफाइ गरी एक मेट्रिक टन फोहर व्यवस्थापन गरियो। चक्रपथको बाफल खण्डको ३२औँ हप्ताको सफाइका क्रममा बालाजु क्षेत्रमा सफाइ गरी तीन मेट्रिक टन फोहर व्यवस्थापन गरिएको सफाइ संयोजक ताराबहादुर कुँवरले सुनाए।

चैत १०, २०७४ मा प्रकाशित
प्रतिक्रिया दिनुहोस्