सेयर बजारमा भारी गिरावट, लाग्यो सर्किट ब्रेक

काठमाडौं – सेयर बजार परिसूचकमा भारी गिरावट आएको छ । सेयर बजार खुलेदेखि घट्न थालेको बजारमा नेप्से परिसूचकमा तीन प्रतिशत भन्दा बढीले गिरावट आएपछि सर्किट ब्रेक लागेको छ । नेप्से परिसूचक ३६ अंक भन्दा बढीले घटेको छ ।

१५ मिनेटका लागि सर्किट ब्रेक लागेको हो । यसपछि खुलेको बजारमा नेप्से सूचकमा चार प्रतिशत भन्दा बढी गिरावट आएमा ३० मिनेटका लागि सर्किट ब्रेक लाग्ने छ ।

र त्यसपछि पनि बजार घट्ने क्रम नरोकिएमा दिनको कारोबार बन्द हुनेछ । अर्थ मन्त्रीको अभिव्यक्तिपछि सेयर बजारमा गिरावट आएको हो ।

पहिलो सर्किट ब्रेकर लाग्दा सम्म ८७ कम्पनीको ४ करोड ९८ लाख रुपैयाँ बराबरको कारोबार भएको छ ।

के हो सर्किट ब्रेकर?


नेप्से कारोबार विनियमावली अनुसार सेयर कारोबार सुरु भएको १ घण्टामा नेप्से परिसूचक ३ प्रतिशत बढ्दा वा घट्दा सेयर कारोबार १५ मिनेट रोकिन्छ।

सर्किट ब्रेकर पछि वा कारोबार सुरु भएको २ घण्टामा परिसूचक ४ प्रतिशतले बढ्दा वा घट्दा कारोबार ३० मिनेट रोकिने गर्छ। परिसूचक ५ प्रतिशतले घट्दा वा बढ्दा सो दिनको कारोबार नै बन्द हुन्छ।

चैत १२, २०७४ मा प्रकाशित
प्रतिक्रिया दिनुहोस्