ज्याला माग्दा वडाध्यक्षले मनबहादुरलाई कुटे

बाजुरा – बाजुराको जगन्नाथ गाउँपालिका–६ का मनबहादुर विष्टलाई सोही वडाका वडाध्यक्षले कटकबहादुर विष्टले यातना दिने गरी कुटपिट गरेका छन् ।

विद्युत आयोजना निर्माणमा ज्यालादारीमा काम गरेको ज्याला माग्दा कुटपिट गरेको स्थानीय बासिन्दाले बताएका छन् । वडाध्यक्ष भुकाखोला लघु जलविद्युत आयोजनाका अध्यक्षसमेत रहेका छन् । ज्याला माग्दा निर्घातरुपमा कुटिएको पीडित मनबहादुर विष्टले बताए ।

उनले भने, “गाउँमा रहेको भुकाखोला लघु जलविद्युत निर्माण भएको लामो समय वितिसक्दा पनि नपाएको ज्याला चैते दसैँ मनाउनका लागि माग्दा वडाध्यक्ष कटकबहादुर विष्टले निर्घात रुपमा हातखुट्टा बाँधेर गाई गोरुको गोठमा थुनेर कुटपिट गरे ।’

वडाध्यक्षको कुटाइको खबरपछि पिलुचौर प्रहरी चौकीको टोलीले घाइते विष्टको उपचारका लागि जिल्ला सदरमुकाम मार्तडीमा मंगलबार ल्याएको जिल्ला प्रहरी कार्यालय बाजुराका प्रहरी नायब उपरीक्षक हरिबहादुर वलीले जानकारी दिए ।

थप उपचार र जानकारीका लागि विष्टलाई प्रहरी कार्यालयमा ल्याइएको उनले बताए । विष्टलाई कुटपिट गर्ने वडाध्यक्ष कटक विष्टलाई भने पक्राउ नगरेको बताइएको छ ।

वडाध्यक्ष विष्टले मनबहादुर विष्टले मदिरा सेवन गरी गाली गलौज गरेकाले हातखुट्टा बाँधेर प्रहरीलाई खबर गरेको बताए । आफूले मन विष्टलाई कुटपिट नगरेको उनको भनाई छ ।

चैत १४, २०७४ मा प्रकाशित
प्रतिक्रिया दिनुहोस्