नेपालगञ्ज – रातिको समयमा एक्लै हिँड्दै हुनुहुन्छ ? सावधानी अपनाउनु होला । रातिमा एक्लै हिँड्ने मान्छेलाई लुट्ने गिरोह नेपालगञ्जमा सक्रिय भएका छन् ।

चोरी र लुटपाटलाई नै आफ्नो ‘कर्म’ बनाएको गिरोहले रातिमा एक्लै हिँड्ने मान्छेलाई लुट्ने गरेका हुन् । नेपालगञ्जको बालेगाउँमा गएराति एक भारतीय नागरिक लुटिएका छन् । दिदीको घरबाट राति घरतर्फ फर्किँदै गरेका भारत रुपैडिहाका ओमप्रकाश तेलीलाई नेपालगञ्ज–११ भवानीबगियाका सुरज सोनी र आकाश बाल्मिकीले लुटेका हुन् ।

सुरज र आकाशले नाइनेस्टिक देखाएर भारतीयलाई रोकेका थिए । भारतीय नागरिक ओमप्रकाशलाई कुटपिट गर्दै पैसा लुट्ने प्रयास गरेका थिए । ओमप्रकाशसँग पैसा नभएपछि उसको मोटरसाइकल नै लिएर हिँडेका थिए । लुटेराले मान्छेलाई कुटेर मोटरसाइकल लिएर हिँडेपछि राति नै उजुरी प्रहरीकहाँ आइपुगेको थियो ।

प्रहरीले एकजनालाई राति नै र अर्कालाई बिहीबार बिहान पक्राउ गरेको छ । मोटरसाइकल नेपालगञ्जको सुनारमण्डीमा अलपत्र छोडिएको थियो । वडा प्रहरी कार्यालयका प्रमुख राजन गौतमले दुवैलाई चोरी, लुटपाट र कुटपिटमा कारबाही प्रक्रिया अघि बढाउने तयारी भएको बताए ।

सुरज र आकाश धेरै पहिलादेखि नै चोरी, लुटपाट धन्दामा लागेको स्थानीय बताएका छन् । नेपालगञ्जमा चोरी, लुटपाट गर्ने र भारतमा गएर मस्ती गर्ने उनीहरुको धन्दा थियो । पछिल्ला तीन वर्ष मुम्बईमा बसेर फर्किएका उनीहरु फेरि लुटपाट धन्दामा लागेका थिए ।

नेपालगञ्जमा ठूल्ठूला चोरी दिउँसो हुने गरेका छन् । रातिको चोरी पनि उत्तिकै छन् । नेपालगञ्जमा चोरी, लुटपाट गर्ने र भारतका विभिन्न शहरमा गएर बस्नेको गिरोह नै रहेको प्रहरीले निष्कर्ष निकालेको छ । प्रहरीले अहिले पक्राउ परेका सुरज र आकाश पनि लामो समयदेखि प्रहरीले खोजी गरेका व्यक्ति हुन् ।

चैत २२, २०७४ मा प्रकाशित
प्रतिक्रिया दिनुहोस्