नेपालका जीतु राईले जिते भारतका लागि स्वर्ण पदक

जीतु राई

भारतीय सेनाका निशानेबाज जीतु राईले अस्ट्रेलियाको गोलकोस्टमा भइरहेको कमनवेल्थ खेलमा १० मिटर एयर पिस्तोल प्रतिस्पर्धामा नयाँ कीर्तिमानसँगै स्वर्ण पदक जितेका छन् ।

जीतुले २३५.१ अंक जोडेर भारतलाई स्वर्ण पदक दिलाएका छन् ।

को हुन जीतु राई ?


जीतु राई जुन हातले अहिले निशाना लगाउँछन् १२ वर्ष पहिला त्यही हातले नेपालको एक सानो गाउँमा मकै र आलुको खेती गर्थे । घरमा नै भैँसी र बाख्रासँग उनको समय बित्ने गर्थ्यो ।

संखुवासभाका जीतु भारतीय सेनामा कार्यरत छन् । जीतुका बुवा भारतीय सेनामा थिए, जसले चीन र पाकिस्तानसँगको युद्धमा भारतको तर्फबाट लडेका थिए ।

ब्रिटिस आर्मीमा भर्ती हुने मन भए पनि जीतु २० वर्षको उमेरमा भारतीय सेनामा भर्ती भए । सन् २००६–२००७ मा जीतु ब्रिटिस आर्मीमा भर्ना हुनका लागि गएका थिए । तर त्यहि बेला भारतीय सेनाका लागि पनि फारम परेका थिए । ब्रिटिस आर्मीको भन्दा पहिला भारतीय आर्मीका लागि उनी चयन भए ।

भारतीय सेनाको ‘गोरखा रेजिमेन्टमा’ नेपालहरु गोरखा सैनिकका रुपमा भर्ती हुन्छन् ।

निसाना राम्रो भएका जीतुलाई यो खेल सुरुमा राम्रो लागेको थिएन, जब उनी लखनउको सैन्य अड्डामा थिए ।

उनेको खुबी देखेर भारतीय सेनाको निशानेबाजको युनिटमा पठाइयो तर सुबेदार जीतुलाई लगातार २ वर्ष फेल गरेर फिर्ता पठाइयो ।

त्यसपछि उनको जीवन फेरियो र उनले कडा मेहनत गर्न सुरु गरे । जीतुले भारतीय सेनामा रहेर २०१३ बाट अन्तर्राष्ट्रिय प्रतियोगितामा भाग लिन सुरु गरे र एक वर्षमा नै विश्वभरि आफूलाई चिनाउन सफल भए ।

उनले २०१४ मा कमनवेल्थ खेलमा ५० मिटर पिस्तोल वर्गमा स्वर्ण पदक जिते भने त्यसै वर्ष एसियन गेम्समा भारतका लागि पहिलो स्वर्ण पदक जीतुले नै जितेका थिए ।

२०१४ मा नै जीतुले १० मिटर एयर पिस्तोमा गोल्ड र ५० मिटर एयर पिस्तोलमा रजतसहित नौ दिनमा तीन वर्ल्डकप पदक जितेर कीर्तिमान बनाएका थिए ।

२०१६ मा ओलम्पिकमा पदक जित्न नसक्नु उनको कमजोरी मानिन्छ । उनको सपना थियो, ओलम्पिकमा पदक जित्ने ।

२०१८ मा उनले राम्रो पुनरागमन गरे, मेक्सिकोमा भएको वर्ल्ड कपमा उनले कास्य पदक जिते ।

धेरै वर्षसम्म जीतुको घरमा थाहा थिएन कि उनी विश्वभरबाट पदक जितिरहेका छन् भनेर । जब जीतुले अर्जुन पुरस्कार पाए त्यसपछि आमालाई थाहा भयो कि छोरो कति ठूलो खेलाडी भएछ भनेर ।

कहिले काहीँ उनी घर आउँछन् र उनलाई आफ्नो घर पुग्न धेरै दिन लाग्छ । उनलाई गाउँ पुग्न ३ दिनसम्म लाग्छ । अब जीतु जहाज चढेर जान्छन् तर गाउँ र घरसम्म पुग्न अझै हिँडेर जानु पर्छ ।

चार वर्ष पहिला उनको गाउँमा बिजुलीको पहुँच भयो । त्यो भन्दा अगाडि गाउँमा उज्यालो कसैले देखेको थिएन तर गाउँको एक युवाले विश्वभरमा आफ्नो नाम उज्यालो बनाएको छ ।

निसानेबाज जीतु फुर्सद भए पछि भलिबल र अमिर खानका फिल्म हेर्न मन पराउँछन् ।

स्रोत : बिबिसी हिन्दी

चैत २६, २०७४ मा प्रकाशित
प्रतिक्रिया दिनुहोस्