रवीन्द्र मिश्रले भने, भ्रष्टाचारको अन्त्य नभई सम्बृद्धि आउँदैन

विर्तामोड- विवेकशील साझा पार्टीका अध्यक्ष रविन्द्र मिश्रले भ्रस्टाचारको अन्त्य नभएसम्म नेपालले आर्थिक समृद्धि हासिल गर्न नसक्ने बताएका छन्।

झापाको विर्तामोडमा सोमबार आयोजित साक्षात्कार कार्यक्रममा उनले अख्तियार दुरुपयोग अनुसन्धान आयोगमा भ्रस्टाचारीहरुको खोजी गरेर दण्डित गर्नसक्ने जनशक्ति भएमा भ्रस्टाचारका घटनामा कमी आउने बताए।

उनले अहिलेसम्म राजनीतिक दलका नेताहरुको भ्रस्टाचार लुकाइदिने मान्छे अख्तियारमा गएका हुनाले अख्तियारले राम्ररी काम गर्न नसकेको बताए। मिश्रले भने, ‘भ्रस्टाचार नियन्त्रण गर्ने हो भने अख्तियारमा काम गर्ने क्षमतावान मानिसहरु नियुक्त गर्नुपर्छ।’

नेपालका सामुदायिक विद्यालयलाई स्तरोन्नति नगरी शिक्षामा गुणस्तर कायम हुन नसक्ने उनले बताए। संसारका धेरै देशहरुमा सामुदायिक विद्यालयहरुको अवस्थाको उदाहरण दिँदै मिश्रले भने, ‘निजी विद्यालय भन्दा सामुदायिक विद्यालयले राम्रो जनशक्ति उत्पादन गर्न सक्छन्। तर त्यहाँ राजनीति घुसाइनु हुन्न।’

उनले देशमा सुशासन र गुणस्तरीय शिक्षा भए मात्र देशको विकास हुने दाबी गरे। उनी झापाका राजनीतिक दलका अगुवा, सामाजिक संस्थाका प्रतिनिधि तथा सञ्चारकर्मीमाझ बोल्दै थिए।

बैशाख ३, २०७५ मा प्रकाशित
प्रतिक्रिया दिनुहोस्