आजको मौसम : कता खुल्छ, कुन क्षेत्रमा बदली र वर्षा ?

फाइल फोटो

काठमाडौँ – मध्य तथा पश्चिमी क्षेत्रमा मंगलबार मौसम खुल्दै गएको तर पूर्वी क्षेत्रमा भने सामान्यतया बदली भइ पानी पर्ने सम्भावना रहेको जल तथा मौसम पूर्वानुमान महाशाखाले जनाएको छ ।

वायुमण्डलको माथिल्लो सतहमा पश्चिमी वायुको प्रभाव तथा तल्लो सतहमा भारतको बिहारमा बनेको न्यून चापीय रेखाका मध्यबाट पूर्व लागेकाले पूर्वी क्षेत्रको मौसम बदली भइ पानी पर्ने सम्भावना रहेको मौसमविद सुवास रिमालले बताए ।

अहिले पश्चिम र मध्य क्षेत्रमा मौसम खुल्ने क्रम छ । विशेष गरी पूर्वी क्षेत्रमा बढी बदली रहेको मौसमविदको भनाई छ । पूर्वमा मंगलबार दिनभर नै मौसम बदली हुनेछ ।

यस्तै पूर्व तराई तथा पहाडका केही क्षेत्रमा मेघगर्जनसहित हुरीबतास चल्ने सम्भावना पनि रहेको छ । पूर्वका उच्च पहाडी तथा हिमाली क्षेत्रमा हिउँ पर्ने सम्भावना रहेको छ । यसले गर्दा सगरमाथा आरोहणका लागि गएकालाई केही असजिलो हुन सक्छ ।

काठमाडौं उपत्यकामा भने बिहानैदेखि घाम लागेजस्तो देखिए पनि बदली हुने र खुल्ने क्रम दिनभर जारी रहने मौसमविद रिमालले बताए । दिउँसोतिर वा बेलुकातिर फाट्फुट् पानी पर्ने सम्भावना पनि छ ।

जेष्ठ १, २०७५ मा प्रकाशित
प्रतिक्रिया दिनुहोस्