विमान दुर्घटनाको कुरा संसदमा, ध्यान दिन सरकारलाई आग्रह

काठमाडौँ – नेपाली कांग्रेसका नेता तथा सांसद दिलेन्द्रप्रसाद बडुले विमान दुर्घटना बारम्बार भइरहेको भन्दै त्यसतर्फ सरकारको ध्यान जानु पर्ने बताएका छन् ।

प्रतिनिधिसभाको बुधबारको बैठकमा विशेष समयमा बोल्दै सांसद बडुले हुम्लामा बिहान भएको विमान दुर्घटनाप्रति दुःख व्यक्त गर्दै बारम्बार भइरहने दुर्घटना अन्त्य नभए कम गर्नका लागि सरकारको ध्यान जानु पर्ने बताएका हुन् ।

यस्तै त्रिभुवन अन्तर्राष्ट्रिय विमानस्थलमा भएको दुर्घटनामा ज्यान गुमाएका विदेशी नागरिकका परिवारले क्षतिपूर्ति पाएको तर नेपालीका परिवारले नपाएको भन्दै सरकारको ध्यानाकर्षण गराए ।

युएस बंगला विमान दुर्घटनामा २३ नेपाली तथा २८ विदेशीको ज्यान गएको थियो ।
विदेशी नागरिकका परिवारले २० हजार अमेरिकी डलरको दरले क्षतिपूर्ति पाएका छन् । तर नेपाली पीडितका परिवारले पाएका छैनन् ।

दुर्घटनाबारे छानबिन गर्न गठित समितिलाई क्षतिपूर्ति सम्बन्धी निर्णय गर्ने अधिकार नरहेकाले यस्तो भएको भन्दै सांसद बढुले सरकारको ध्यानाकर्षण गराएका हुन् ।

जेष्ठ २, २०७५ मा प्रकाशित
प्रतिक्रिया दिनुहोस्