प्रदेश २ मा २९ अर्ब ७८ करोड बजेट

जनकपुरधाम- प्रदेश नं. २ को आर्थिक वर्ष २०७५/०७६ को लागि कूल २९ अर्ब ७८ करोड ६९ लाख ३८ हजार बजेट विनियोजन गरेको छ । जस मध्ये कूल विनियोजित बजेट मध्ये चालु तर्फ १४ अर्ब ४७ करोड ५६ लाख १४ हजार अर्थात ४८.६० प्रतिशत र पुँजीगत तर्फ १५ अर्ब ३१ करोड १३ लाख २५ हजार अर्थात ५१.४० प्रतिशत बजेट विनियोजन गरेको छ।

प्रदेश नं. २ का आर्थिक मामिला तथा योजना मन्त्री विजय कुमार यादवले आगामी आर्थिक वर्षको लागि अनुमान गरिएको खर्च मध्ये राजश्वबाट १० अर्ब ४८ करोड ९७ लाख ३८ हजार, नेपाल सरकारबाट प्राप्त हुने वित्तिय समिकरण अनुदानबाट ७ अर्ब ७१ करोड ६१ लाख र सशर्त अनुदानबाट ९ अर्ब १८ करोड ११ लाख गरी जम्मा १८ अर्ब २० करोड ५८ लाख ३८ हजार विनियोजन गरिएको छ।

त्यसैगरी विशेष अनुदानबाट १ अर्ब र समपुरक अनुदानबाट ४० करोड गरी कूल २८ अर्ब ७८ करोड ६९ लाख ३८ हजार बजेट प्रस्तुत गरिएको छ । जसमा १ अर्ब खुद न्युन हुन जाने व्यहोरा उल्लेख गरिएको छ।

प्रदेश २ को सरकारले सुशासन, भौतिक पुर्वाधार निर्माण तथा समाजिक विकास, नीतिगत कानून एवं संरचनागत प्रबन्ध, सार्वजनिक सेवा प्रवाहमा सुधार र सार्वजनिक खर्चमा वित्तिय अनुशासन र पारदर्शितालाई प्राथमिकतामा राखेको छ।

यसैगरी बालबालिकाको हित संरक्षण एवं महिला सशक्तिकरण तथा क्षमता विकास, उद्यमशिलताको विकास र रोजगारी सृजना, प्रदेशको मौलिकता, ऐतिहासिकता तथा सांस्कृतिक धरोहरहरुको संरक्षण सम्बद्र्धन र प्रबद्र्धन, सरसफाई एवं वातावरणी स्वच्छता अभिबृद्धि र संघ र स्थानीय तहसंग र्साहार्दपूर्ण सम्बन्धको विकास तथा सहकारितामा जोड दिएको छ।

जस अन्तर्गत प्रत्येक गाउँपालिका, नगरपालिका र उपमहानगरपालिकालाई क्रमशः ५० लाख, १ करोड र २ करोड सशर्त अनुदान अन्तर्गत जम्मा १ अर्ब ५० करोड बजेटको व्यवस्था गरेको छ।

प्रदेशसभा सदस्य निर्वाचन क्षेत्र विकास कार्यक्रम अन्तर्गत ५० लाखको दरले ३२ करोड विनियोजन गरिएको छ भने, जनआवश्यकता अनुसारको आयोजना छनौट गरी कार्यान्वयनका लागि २५ लाखको दरले २६ करोड ७५ लाख रकम विनियोजन गरी कार्यक्रम कार्यान्वयनका लागि ५८ करोड ७५ लाख बजेट विनियोजन गरिएको छ।

प्रदेश शासन व्यवस्था अन्तर्गत ‘आपके सरकार आपके द्वार” अभियानलाई आल्पकालिन, दिर्घकालिन योजना बनाई प्राथमिकता दिदै मुख्यमन्त्रीद्वारा सञ्चालित “बेटी पढाउ बेटी बचाउ अभियान” अन्तर्गत २० करोड ९२ लाख बजेट विनियोजन गरिएको छ।

यसैगरी एक घर एक शौचालय कार्यान्वयन गरी सडक, नगर, ग्राम, पोखरी, मन्दिर, नदीलाई हरित बनाउदै मुख्यमन्त्री स्वच्छता अभियान अन्तर्गत २१ करोड ६१ लाख विनियोजन गरिएको छ।

यसैगरी मुख्मन्त्री राहत तथा पुनःस्थापना कोषमा १५ करोड तथा आर्थिक मामिला तथा कानून मन्त्रालय मातहत रहेको प्राकृतिक विपद् व्यवस्थापन कोषमा ४ करोड २५ लाख विनियोजन गरिएको छ।

भौतिक पुर्वाधार विकास

प्रदेशमा सडक सञ्जाल विस्तारका लागि १ अर्ब २६ करोड, “हर खेतमे पानी हरहातमे काम” भन्ने नारालाई सार्थक तुल्याउन झाँझ सिचाई प्रणाली, नारायणी सिचाई प्रणाली लगायतका सिचाई क्षेत्रका लागि ५२ करोड ५२ लाख विनियोजन गरिएको छ ।

प्रदेशलाई उर्जामा आत्मनिभृर बनाउन उर्जा क्षेत्र विकासका लागि ८ करोड २० लाख, बाढी व्यवस्थापन र वस्ति व्यवस्थापन कार्यक्रमको लागि ३ करोड, नदी नियन्त्रण र आपत्तकालिन तथा बाढी पुनःस्थापनाका लागि ३६ करोड १८ लाख, पर्सा, बारा, धनुषा, सिरहा लगायतको जिल्लामा सेटेलाईट सिटीको सम्भाव्यता अध्ययन तथा सुरुवातीका लागि २ करोड ८५ लाख विनियोजन गरिएको छ।

समाजिक विकास

सप्तरी स्थित गजेन्द्र नारायण सिंह सगरमाथा अञ्चल अस्पताल, जनकपुर अञ्चल अस्पताल, नारायणी उपक्षेत्रीय अस्पताललाई आवश्यक उपकरण सहित सुविधा सम्पन्न अस्पतालको रुपमा विकास गर्न ३० करोड, सप्तरीको रुपनीमा प्रहरी अस्पताललाई प्रदेश ट्रमा सेन्टरको रुपमा विकास गर्न १ करोड, औलो रोगबाट बच्न सुपानेट झुल वितरणका लागि ५ करोड विनियोजन गरिएको छ।

यसैगरी जनकपुरधामको राजर्षि जनक विश्वविद्यालयको भौतिक पुर्वाधार विकास तथा क्षमता अभिबृद्धिका लागि १ करोड रकम दलित विद्यार्थीलाई अध्ययनमा सहयोगी हिसावले प्रत्येक जिल्लामा दलित छात्रावास निर्माणका लागि ८ करोड, खेलकुद क्षेत्रको समग्र विकासका लागि “खेलेगा मधेश, खिलेगा मधेश” अभियान अन्तर्गत ९ करोड ७४ लाख रकम विनियोजन गरिएको छ ।

भुमि व्यवस्थापन, कृषि तथा सहकारी

किसानहरुको उपजको सही मुल्य निर्धारण तथा व्यवस्थापनको सहजताका लागि ८ वटै जिल्लामा कोल्ड स्टोर निर्माणका लागि १६ करोड, कृषकलाई मेशनरी औजार, कृषि सामग्री, विउविजन, चुरे क्षेत्र ईनार निर्माणका लागि १ अर्ब ४४ करोड, कृषि ज्ञान केन्द्रको पुर्वाधार निर्माणको लागि ३ करोड ५० लाख विनियोजन गरिएको छ।

उद्योग पर्यटन, वन तथा वातावरण

कुटिर उद्योग विकासका लागि ४ करोड, वन वैज्ञानिक कार्यक्रम सञ्चालन गर्न १७ करोड ६० लाख, मध्य मिथिला परिक्रमा स्थलहरुमा रामजानकी डोला विसौनी घर निर्माणका लागि १ करोड २० लाख, नारायण डाडा, सर्लाहीमा टेलिस्कोप सहितको भ्यु टावर निर्माण गर्न १ करोड, सिरहामा तेन्जिङ्ग शेर्पा र एडमण्ड हिलारी प्रवशेद्वारा निर्माणका लागि १ करोड र पर्यापर्यटन विकास तथा होमस्टे पुर्वाधार विकासका लागि २ करोड ६० लाख बजेट विनियोजन गरिएको छ।

असार १, २०७५ मा प्रकाशित
प्रतिक्रिया दिनुहोस्