आँखाका समस्याबारे छलफल गर्न सार्क सम्मेलन हुँदै

काठमाडौँ– आँखा स्वास्थ्य सम्बन्धी समस्या र समाधानको लागि नयाँ प्रविधिबाट गर्न सकिने रोकथाम, उपचार र निर्मुलीकरण विषयमा छलफल हुने भएको छ। सिमारहित दृष्टि विषयमा १४ औँ द्वै वार्षिक सार्क एकडेमी अफ अफथालमोलजी सम्मेलन २०१८ हुन लागेको हो।

सम्मेलनमा २० औं नेपाल अफ्थाल्मिक सोसाइटीको वार्षिक वैठक पनि हुनेछ। सम्मेलको उद्देश्य सार्क राष्ट्रहरुमा देखिएका आँखा समस्या र त्यसको समाधान गर्नु हो।

आयोजक समितिका अध्यक्ष प्रा.डा.सुमन थापाका अनुसार सार्कका देशहरु (नेपाल, भारत, पाकिस्तान, अफ्गानिस्तान, बगंलादेश, माल्दिभ्स, भुटान र श्रीलंका) मा आँखाको समस्याहरु एकै खालको हुन्छ । भौगोलिक, आर्थिक, वातावरणीय हिसाबले पनि प्राय एकै हुनाले आँखाको समस्या एकै खालको देखिने गरेको छ ।

सार्क लगायत विश्वका अन्य विभिन्न देशबाट आएका नेत्रचिकित्सक, मध्यमस्तीय आँखा स्वास्थ्यकर्मी लगायत अन्यद्धारा आँखा स्वास्थ्य सम्बन्धी अनुसन्धान, सार्कमा भएका आँखा स्वास्थ्य क्षेत्रमा भएका नयाँ प्रविधिको आविष्कार, आँखामा हुने दुर्लभ रोग, अन्धोपन न्यूनिकरण र आँखामा हुने विभिन्न प्रकारको रोगहरुलाई उपचार तथा निर्मूल आदि विषयमा आफ्नो अनुभव आदानप्रदान गरिने छ ।

सम्मेलनका साइन्टीफिक कमिटिका सचिव डा.इली प्रधानका अनुसार आँखा स्वास्थ्य सँगै शिक्षा, आर्थिक, सामाजिक र भौगोलि विकटता रहेको यी देशहरुमा सर्वसुलभ ढंगबाट बिरामीहरुलाई आँखाको उपचार विधि अपनाउने विषयमा छलफल हुनेछ। साथै बदलिदों वायु प्रदुषण, वायुमण्डलको प्रभाव, मानिसहरुको बदलिदो जिवनशैली र त्यसले आँखा स्वास्थ्यमा पार्ने असर, बढ्दो स्मार्ट ग्याजेट–मोबाइलबाट आउनसक्ने समस्याहरु र अपनाइनुपर्ने सावधानीहरु विषयमा छलफल हुनेछ ।

सम्मेलनमा २४ भन्दा बढी देशका आँखा स्वास्थ्य क्षेत्रको प्रमुख नेतृत्वकर्ता, वैज्ञानिक, अनुसन्धानकर्ता, शल्यचिकित्सक, सामान्य नेत्र विशेषज्ञ, आवासिय चिकित्सक, अस्पताल प्रशासन प्रमुख आदि लगायतको सहभागी रहनेछ ।

आयोजक समितिका सचिव प्रा.डा. सबिना श्रेष्ठका अनुसार सार्क एकडेमी अफ अफ्थाल्मोलोजी र नेपाल अफ्थाल्मिक सोसाइटीले संयुक्त रुपमा आयोजन गर्न लागेको यो सम्मेलन जुन २१ देखि २४ सम्म चल्नेछ।

सम्मेलनमा राष्ट्रिय र अन्तराष्ट्रिय (सार्क क्षेत्रका देश लगायत अमेरिका, बेलायत, रसिया, सेनेगल, जापान, क्यानडा, जर्मनी, चिन, सिंगापुर, दक्षिण कोरिया, ताइवान, इथियोपिया, घाना आदि) देशका विज्ञहरुले कार्यपत्र प्रस्तुत गर्दैछन् । ६०० जनाको सहभागिता रहने सम्मेलनमा आँखाका विभिन्न विधा जस्तै पेडियाट्रिक अफथालमोलजी (बाल आँखा रोग तथा डेढो आँखा), कर्निया (आँखाको नानी), क्याट्र्याक्ट (मोतीविन्दु), रिफ्र्याक्टिभ सर्जरी, युभिया, न्यूरो अफ्थाल्मोलोजी (आँखाको नशा), रेटिना (आँखाको पर्दा), ग्लोकमा (जलविन्दु), अकुलोप्लाष्टिक (आँखाको प्लाष्टिक), एडभोकेसी, अस्पताल प्रशासन लगायतका विषयमा कार्यपत्र प्रस्तुत तथा छलफल हुनेछ।

असार ४, २०७५ मा प्रकाशित
प्रतिक्रिया दिनुहोस्