६४ लाख रुपैयाँमा अनलाईन ट्रेडिङ सफ्टवेयरको युएटी हुने

काठमाडौं- भारतिय कम्पनी एकेएस ईन्फरमेसन टेक्नोलोजी एण्ड सर्भिसेजले नेपाल स्टक एक्सचेञ्ज (नेप्से) को अनलाईन ट्रेडिङ सफ्टवेयरको युजर एसेपटेन्स टेस्ट (युएटी) गर्ने भएको छ। नेप्से स्रोतका अनुसार ६४ लाख रुपैयाँमा युएटी गर्ने प्रस्ताव गरेको एकेएस ईन्फरमेसन टेक्नोलोजीलाई आगामी साता नेप्सेले छनौट गर्ने भएको हो।

युएटि गर्दा सफ्टवेयर निर्माता कम्पनी वाईकोले नेप्से सँग भएको करार सम्झौता, एसआरएस (सिस्टम रिक्वायरमेन्ट स्पेसिफिकेसन) बमोजिम सफ्टवेयर बने नबनेको परीक्षण गरिने छ। यस्तै सफ्टवेयरका सुरक्षा प्रणालीका बिषयमा पनि युएटी गर्दा हेरिने छ।

गत जेठ ११ गते युएटि गर्ने कम्पनीलाई छनोट गर्न नेप्सेले ३० दिने सूचना प्रकाशित गरेको थियो। गत असार १० गते अन्तिम दिन सम्म भारतिय कम्पनी एकेएस र क्याप स्टार्ट सर्भिसेजले युएटी गर्ने भन्दै नेप्सेमा आवेदन दिएमा थिए।

क्याप स्टार्ट सर्भिसेजले १ करोड ६० लाख रुपैयाँमा युएटि गर्ने प्रस्ताव गर्दा एकेएसले ६४ लाख रुपैयाँमै युएटि गर्ने प्रस्ताव गरेको थियो।

नेप्से स्रोतले भन्यो, ‘सरूमा हामीले दुबै कम्पनीको प्राविधिक प्रस्ताव अध्ययन गरेका थियौं। त्यसमा एकेएस सबल देखियो। एकेएसले बिगतमा पनि धेरै सफ्टवेयरको टेस्ट गरेको रहेछ। र आर्थिक रुपमा पनि एकेएस निकै सस्तो भएकाले अब आगामी बोर्ड बैठकले त्यसैलाई छनोट गर्छ होला।’

नेप्सेले युएटि गर्न १ करोड ५० लाख रुपैयाँ छुट्याएको भए पनि ६४ लाख रुपैयाँमै युएटि हुने भएको हो।

सफ्टवेयर युएटि भएपछि निर्माता कम्पनी वाईकोले सोही बमोजिम परिमार्जन गर्नेछ। र त्यसपछि मात्रै सेयर लगानिकर्ताले आफैं सेयरको खरिद बिक्रि गर्न सक्नेछन्।

नेप्से साउन १ गतेबाट अहिलेको ट्रेडिङ मेकानिम र अनलाईन सँग सँगै सञ्चालनमा ल्याउने बताई रहेको छ। तर युएटि नगर्दै सफ्टवेयर पूर्ण सञ्चानमा आउन नसक्ने नेप्सेका केहि अधिकारी बताउँछन्।

असार २१, २०७५ मा प्रकाशित
प्रतिक्रिया दिनुहोस्