नारायणगढ–मुग्लिन सडकखण्ड : अहिले समस्या छैन

काठमाडौँ – निर्माणको अन्तिम चरणमा पुगेको नारायणगढ–मुग्लिन सडकखण्डमा आइतबार नियमित रुपमा गाडी सञ्चालन भएका छन् ।

बाटोमा कहिँ कतै पहिरो नगएकाले आवत–जावतमा समस्या नरहेको आयोजनाका सूचना अधिकारी शिव खनालले जानकारी दिए । निर्माणको क्रममा पहिरोको जोखिम देखिएका क्षेत्रमा पहिरो रोकथामका लागि गरिएका काम प्रभावकारी देखिएकाले समस्या कम भएको उनले बताए ।

यो सडकखण्डका २७ किलो, भालुढुङ्गा, चार किलो, चोरखोला तथा टोपे खोलासहितका ठाउँमा भौगोलिक रुपमा पहिरोको जोखिम बढी देखिएको छ ।

यी ठाउँमा पहिरो रोकथामका लागि रक नेटिङ्ग, रक बोल्डिङ, रक एङ्करिङगसहितका काम गरिएको उनले बताएका छन् । अहिले स्लोप ट्रिमिङ्ग गरिएका क्षेत्रमा पहिरो रोकथामका लागि थप उपायहरु अपनाइने आयोजनाले जनाएको छ ।

बर्खाको सिजन रहेको र माटो कमजोर तथा चलायमान रहेका क्षेत्रमा पहिरो जोखिम भएकाले यात्रुलाई सचेत हुन भने आयोजनाले आग्रह गरेको छ । आफूहरु पनि कुनै अवरोध आएमा त्यसलाई हटाउनका लागि तयारी अवस्थामा रहेको सूचना अधिकारी खनालले बताए ।

असार २४, २०७५ मा प्रकाशित
प्रतिक्रिया दिनुहोस्