देशसञ्चार समाचार प्रभाव

न्यूरोडमा मोबाइल बेच्‍ने ११ पसल परे कारबाहीमा

काठमाडौँ – करदाता सेवा कार्यालय न्यूरोडले न्यूरोडमा मोबाइल विक्री गर्ने  ११ पसललाई कारबाही गरेको छ। देशसञ्चारले न्यूरोडमा भ्याट बिलबिना मोबाइल बिक्री गरिरहेको सामाचार प्रकाशित गरेपछि अनुगमनमा गएको करदाता सेवा कार्यालयको टोलीले मोबाईल पसललाई कारबाही गरेको हो।

आन्तरिक राजस्व विभागका महानिर्देशक विष्णु नेपालले देशसञ्चारमा ‘भ्याट बिल लिनु उपभोक्ताका लागि ‘फलामको चिउरा’‘ शिर्षकमा समाचार प्रकाशित भएलगत्तै करदाता सेवा कार्यालय न्यूरोडका प्रमुख ढकराम तिवारीलाई तत्काल बजार अनुगमन गर्न निर्देशन दिएका थिए।

नेपालको निर्देशनपछि बजार अनुगमनमा गएको करदाता सेवा कार्यालयको टोलीले खरिद बिक्री खाता अध्यावधिक नगरेको, कारोबार स्थलमा बिल-बिजक नराखेको, स्टक बुक अध्यावधिक नगरेको भन्दै ११ पसललाई ८५ हजार रुपैयाँ जरिवाना गरेको हो।

करदाता सेवा कार्यालय न्यूरोडका प्रमुख तिवारीले मोबाईल पसललाई ५ हजार रुपैयाँदेखि २० हजार रुपैयाँसम्म जरिवाना गरिएको जानकारी दिए।

तिवारीले आफूहरु नियमित बजार अनुगमनमा जाने बताए पनि एक मोबाईल पसलले देशसञ्चार सँग भने, ‘कर कार्यालयले नियमित  बजार अनुगमन गरेको भए न्यूरोडमा भ्याट बिल बिनाको सामान बिक्री हुन सक्ने थिएन।’

असार २८, २०७५ मा प्रकाशित
प्रतिक्रिया दिनुहोस्