नारायणगढ–मुग्लिन सडक : घुमाउनेमा फेरि पहिरो, बाटो अवरुद्ध

फाइल तस्बिर

चितवन – पहिरोका कारण नारायणगढ–मुग्लिन सडकखण्ड अवरुद्ध भएको छ ।

सडकखण्डको घुमाउने भन्ने ठाउँमा शिनबार राति साढे १० बजेतिर ठूलो पहिरो गएकाले बाटो अवरुद्ध भएको नारायणगढ–मुग्लिन सडक आयोजनाका सिनियर डिभिजनल इन्जिनियर गोविन्द खनालले जानकारी दिएका छन् ।

आइतबार बिहानैदेखि पहिरो हटाउने काम सुरु भएको छ । पहिरो पन्छाएर बाटो खुलाउने प्रयास भइरहेको उनले बताए । पहिरो हटाउन झण्डै चार घण्टाजति लाग्ने प्रहरीले जानकारी दिएको छ ।

शनिबार दिनभरजसो पहिरोका कारण बाटो अवरुद्ध भएको थियो । शनिबार दिउँसो केहीबेर खुलेको बाटो राति फेरि पहिरो खसेका कारण अवरुद्ध भएको हो ।

निर्माणाधीन यो सडकखण्डमा पानी परेपछि प्राय पहिरो जाने गरेको छ । ट्राफिक प्रहरीले पहिरोका कारण बाटो अवरुद्ध भएकाले तत्कालका लागि वैकल्पिक मार्ग प्रयोग गर्न आग्रह पनि गरेको छ ।

साउन २०, २०७५ मा प्रकाशित
प्रतिक्रिया दिनुहोस्