बनिसक्यो नेपालकै पहिलो ‘अण्डरपास’, शुक्रबारदेखि सञ्‍चालनमा (फोटो फिचर)

पूर्वाधार निर्माणमा ऐतिहासिक मानिएको कलंकीमा रहेको नेपालकै पहिलो ‘अण्डरपास’। चीन सरकारको अनुदान सहयोगमा निर्माण भएको ‘अण्डरपास’भोलि(भदौ १ गते) बाट सञ्चालनमा आउँदैछ। तस्बिर-बर्षा शाह/देश सञ्‍चार

काठमाडौं- भोलि(भदौ १ गते) बाट सञ्चालनमा आउने पूर्वाधार निर्माणमा ऐतिहासिक मानिएको नेपालकै पहिलो ‘अण्डरपास’निर्माण कार्य पूरा भएको छ।

चीन सरकारको अनुदान सहयोगमा निर्माण भइरहेको कोटेश्‍वर–बल्खुपुल-कलङ्की चक्रपथ सुधार आयोजना अन्तर्गत अण्डरपास निर्माण तयारी पूरा भएको आयोजना प्रमुख प्रकाश भण्डारीले जानकारी दिएका छन्। उनका अनुसार कलङ्की चोकमा निर्माण भइरहेको ८०० मिटर लामो चार लेनको अण्डर पासमध्ये ४०० मिटर कलङ्की–खसीबजार भागको ‘फिनिसिङ’को कामसमेत सम्पन्न भएको छ।

यसका साथै कलङ्की-बाफल भागको ४०० मिटर ‘फिनिसिङ’को काम सकेर हस्तान्तरणको तयारी समेत भएको उनले बताए। योसँगै कोटेश्वर-बल्खुपुल-कलङ्की १० दशमलव चार किमी सडकलाई आठ लेनमा विस्तार गर्ने काम पूरा भएको छ। नौ किमिको काम सम्पन्न भइसकेको र एक दशमलव चार किमीको काम बाँकी रहेको आयोजनाले जनाएको छ।

‘कोटेश्वर-बल्खुपुलको सबै काम सम्पन्न भएको छ, बल्खुपुलबाट कलङ्कीसम्म सडक विस्तार अन्तिम चरणमा पुगेको छ, मंसिरसम्म सबै काम सकेर सडक हस्तान्तरण हुन्छ’, उनले भने।

चिनियाँ युआन २१ करोड २० लाख अर्थात् नेपाली करीब पाँच अर्ब रुपैयाँ अनुदान सहयोगमा चक्रपथको पहिलो खण्ड विस्तारको काम भएको हो। निर्माण व्यवसायीलाई चीनले नै रकम उपलब्ध गराउने आयोजनाले जनाएको छ।

यस्तै दोस्रो चरणमा कलङ्कीबाट महाराजगञ्जसम्म आठ दशमलव पाँच किमी सडक विस्तारका लागि गृहकार्य सुरु भएको सडक विभागले जनाएको छ। यो खण्डको किनारका संरचना हटाउने काम शुरु गरिएको विभागका प्रवक्ता मुक्ति गौतमले बताए।

साउनसम्म यो खण्डको पनि प्रारम्भिक डिजाइन तयार हुने विभागले जनाएको छ। त्यस लगत्तै काम शुरु हुनेछ। यो खण्ड विस्तारका लागि पनि चीनले नै अनुदान सहयोग गर्नेछ। २८ किमी चक्रपथमध्ये महाराजगञ्ज–कोटेश्वर खण्डका विषयमा भने कुनै प्रक्रिया अघि बढेको छैन।

पूर्वाधार निर्माणमा ऐतिहासिक मानिएको कलंकीमा रहेको नेपालकै पहिलो ‘अण्डरपास’। चीन सरकारको अनुदान सहयोगमा निर्माण भएको ‘अण्डरपास’भोलि(भदौ १ गते) बाट सञ्चालनमा आउँदैछ। तस्बिर-बर्षा शाह/देश सञ्‍चार

 

साउन ३१, २०७५ मा प्रकाशित
प्रतिक्रिया दिनुहोस्