घातक अप्रत्यक्ष धुम्रपान

बच्चाको आडमा बसेर चुरोट पिउँदा गम्भीर समस्या निम्त्याउँछ है !

आफूले धुम्रपान नगर्ने भए पनि फोक्सो सम्बन्धी गम्भीर खालको रोग लाग्ने र ज्यानसम्म जान सक्ने खतरा रहेको अनुसन्धानले देखाएको छ ।

युवा अवस्था लाग्दै गएपछि धुम्रपान नगर्ने व्यक्तिमा पनि फोक्सो सम्बन्धी गम्भीर समस्या देखिन्छ, यदी बाल्यकालमा उनीहरुका अभिभावकले धम्रपान गर्ने गरेका थिए भने । अभिभावकले गर्ने धुम्रपानको असर बच्चा हुर्किएपछि पनि पर्ने देखिएको अमेरिकी अनुसन्धानकर्ताले बताएका छन् ।

प्रत्यक्ष रुपमा धम्रपान नगरे पनि अभिभावकले गर्ने धम्रपानको असर बच्चामा पर्छ । यसलाई अप्रत्यक्ष अर्थात प्यासिभ स्मोकिङ्ग भन्ने गरिएको छ ।

धुम्रपान नगर्ने तर हुर्किने बेलामा अभिभावकले धुम्रपान गरेको भए हरेक एक लाखजनामा सातजनाको मृत्यु फोक्सो सम्बन्धी गम्भीर समस्याका कारण हुने गरेको पाइएको अनुसन्धानकर्ताले बताएका छन् । अमेरिकी क्यान्सर सोसाइटीले धुम्रपान नगर्ने ७० हजार ९०० जनामाथि गरेको अनुसन्धानबाट यस्तो खुलेको हो ।

आफूले गरेको धुम्रपानबाट बच्चाले भविष्यमा भोग्नु पर्ने गम्भीर स्वास्थ्य समस्याबाट मुक्त हुनका लागि अभिभावकले धुम्रपान त्याग्नु सबै भन्दा उत्तम उपाय रहेको अनुसन्धानकर्ताले बताएका छन् ।

यस्तै वयस्क भएपछि पनि आफूले धुम्रपान नगर्ने तर धुम्रपान गर्नेको साथमा बस्नेहरुमा पनि स्वास्थ्य समस्या देखिने गरेको छ । अनुसन्धान अनुसार हप्ताको १० घण्टा वा त्यो भन्दा बढी धुम्रपान हुने वा गर्नेको साथमा बिताएमा इस्कामिक मुटु सम्बन्धी रोगबाट ज्यान गुमाउने खतरा २७ प्रतिशत रहन्छ । यस्तै स्ट्रोकका कारण ज्यान जाने खतरा २३ प्रतिशत हुने अनुसन्धानमा संलग्न डा. रायन डिभरले बताए ।

अमेरिकी जर्नल अफ प्रिभेन्टिभ मेडिसिनमा प्रकाशित अनुसन्धान प्रतिवेदन अनुसार आफूले धुम्रपान नगर्ने तर धुम्रपान गर्नेको साथमा बस्नेहरुमा गम्भीर खालको फोक्सो सम्बन्धी रोगबाट ज्यान जाने खतरा ४२ प्रतिशत रहन्छ ।

अनुसन्धानको क्रममा सहभागीसँग धुम्रपानसँग सम्बन्धी कुरा सोधिएको थियो । त्यसपछि २२ वर्षसम्म उनीहरुको स्वास्थ्य अवस्थाबारे निगरानी गरियो ।

लामो अध्ययनबाट धुम्रपान नगरे पनि बाल्यकालमा अभिभावकले धुम्रपान गरेमा वा वयस्क भएपछि पनि धुम्रपान गर्नेको संगत परेमा फोक्सो तथा मुटु सम्बन्धी रोगका कारण ज्यान जाने खतरा बढ्ने देखियो ।

बच्चाले भविष्यमा भोग्नु पर्ने स्वास्थ्य समस्याबाट जोगाउनका लागि अभिभावकले धुम्रपान त्याग्नु पर्ने, नसके उनीहरु भन्दा पर वा बाहिर गएर धुम्रपान गर्नु पर्नेमा जोड दिइएको छ ।

प्यासिभ स्मोकिङ्गको असर बाल्यकालमा मात्रै नभएर जीवनभर पर्ने ब्रिटिस लङ्ग फाउन्डेशनका स्वास्थ्य सल्लाहकार डा. निक हप्किनसनले बताएका छन् । धुम्रपान गर्ने अभिभावक भएका बच्चामा दमको समस्या हुने र फोक्सोको विकासमा पनि असर पर्ने गर्छ ।

यो अनुसन्धानबाट बाल्यकालमा धुम्रपानको वातावरणमा हुर्किएका व्यक्तिलाई वयस्क भएपछि फोक्सो सम्बन्धी गम्भीर खालको रोग लाग्ने देखिएको छ ।

भदौ ५, २०७५ मा प्रकाशित
प्रतिक्रिया दिनुहोस्