नेपाल आइडलको दोस्रो सिजनमा २० हजार प्रतिष्पर्धी

काठमाडौं-  चर्चित टिभी रियालिटी सो ‘नेपाल आइडल’ को दोस्रो सिजनको अडिसन राउन्ड भर्खरै सकिएको छ। दोस्रो सिजनमा स्वदेशदेखि विदेशसम्मका नेपाली युवा सहित २० हजार जनाले प्रतिस्पर्धीका रुपमा सहभागिता जनाएका छन्। धरान , हेटौडा, वीरगन्ज, भैरहवा, धनगढी, पोखरा र काठमाडौँमा अडिसन भएको थियो।

‘पहिलो सिजनभन्दा दोस्रो सिजन अझ परिष्कृत रुपमा आएको छ जसले आरम्भदेखि नै युट्युबमा रेकर्ड भ्युअरशिप पायो। यो भ्यूअरशिप कुनै पनि प्रकारको कृत्रिमतारहित नितान्त अर्ग्यानिक छ’, प्रोग्रामका प्रोजेक्टहेड, निर्देशक तथा एपिवान टेलिभिजनका अप्रेशन निर्देशक सुरेश पौडेलले बताए।

सन् २००१ मा बेलायती टेलिभिजन प्रोड्युसर साइमन फुलरले ‘पप आइडल’ का रूपमा शुरु गरेको संगीतको यो महासंग्राम बाँकी देशमा सम्बन्धित देशको नामसँग आइडल जोडेर आउने गर्छ। संसारमा सबभन्दा धेरै हेरिने तथा सबभन्दा बढी मनोरञ्जन दिन सफल कार्यक्रमको रुपमा स्थापित आइडल सिरिज १ सय ५० देशहरुमा लोकप्रिय छ।

देशैभरबाट एकत्रित भएका प्रतिस्पर्धीहरुबीच अडिसनपछिका प्रतिस्पर्धाहरु धमाधम चलिरहेका छन् जहाँ सबै एक से एक प्रतिस्पर्धीहरु आफूलाई निखार्न साधनारत छन्।

नेपाल आइडलको दोस्रो सिजनमा बिजेता बन्नेले होन्डाको डब्लुआरभी गाडीसहित २२ लाख रुपैयाँ नगद, एक एल्बम र विश्व टुरको अवसर पाउँछन्।

भदौ १३, २०७५ मा प्रकाशित
प्रतिक्रिया दिनुहोस्