आउँदैछन् नयाँ आइफोनहरु

एप्पलका तीन नयाँ आइफोनः मूख्य विशेषता र सम्भावित मूल्य

एप्पल अब आइफोन वा म्याकबुक र अरु यस्तै सामग्री निर्माता कम्पनी मात्रै होइन । उ कुल पूँजी एक ट्रिलियन अमेरिकी डलर पुग्ने पहिलो अमेरिकी कम्पनी हो ।

एप्पल भन्ने बित्तिकै आइफोनको दिमागमा आइहाल्छ । मोबाइलको विश्व बजारमा आइफोनको माग पनि शीर्ष भित्रै पर्छ । एप्पलले विशेष कार्यक्रमका साथ आफ्नो वार्षिक क्यालेन्डर अनुसार बुधबार नयाँ फोनहरुसहित अरु उत्पादन सार्वजनिक गर्दैछ ।

एप्पलले तीनवटा नयाँ आइफोन, पुनर्संरचना गरिएको एप्पल वाच र नयाँ आइप्याड सार्वजनिक गर्नेै तयारी गरेको विगत केही हप्तादेखि आइरहेका खबरले जनाउँछ ।

एप्पलका प्रमुख कार्यकारी टिम कुकुले क्यालिफोर्नियामा हुने कार्यक्रम मार्फत तीनवटा आइफोन सार्वजनिक गर्ने तयारी रहेको प्रविधिसँग सम्बन्धित विभिन्न समाचार अनलाईन र विज्ञले बताएका छन् ।

एप्पलले आइफोन एक्सएस, आइफोन एक्सएस म्याक्स र आइफोन एक्सआर सार्वजनिक गर्ने तयारी गरेको सिनेटसहितका प्रविधिसम्बन्धी अनलाईनले बताएका छन् ।

एप्पलले सन् २०१२ देखि हरेक सेप्टेम्बरमा नयाँ आइफोन सार्वजनिक गर्ने गरेको छ । यो क्रमम आइफोन फाइभदेखि सुरु भएको हो । एप्पलले सन् २०१४ देखि दुई मोडलका आइफोन सार्वजनिक गर्न थाल्यो ।

गएको वर्ष उसले आइफोन एट र आइफोन एट प्लस ल्यायो । त्यसको केही कप्तापछि पुनर्संचना गरिएको आइफोन एक्स सार्वजनिक गरेर उसले नयाँ संस्करण लञ्च गरेको थियो ।

एप्पलले यो वर्ष पनि एक्स संस्करणमा आधारित तीन फोन सार्वजनिक गर्ने तयारी गरेको विभिन्न खरबमा उल्लेख छ । यी फोनमा होम बटन हुने छैनन् भने फुल स्क्रिन हुनेछ र फेस आइडी पनि समावेश हुनेछ ।

आइफोन एक्सएस


गएको वर्षको आइफोन एक्सको अघिल्लो संस्करणको रुपमा एप्पलले आइफोन एक्सएस ल्याउने लागेको खबर छ । यो फोनमा आइफोन एक्सको भन्दा पर्फमेन्स सुधारिएको हुनेछ ।

यस्तै ड्युअल क्यामराको क्षमतामा सुधार गरिएको र ब्याट्रीको लाइफ पनि बढी बनाइएको हुनेछ । यसको स्क्रिन भने ५.८ इन्चकै ओएलइडी हुने र मूल्य ८९९ अमेरिकी डलर हुने अपेक्षा गरिएको छ ।

आइफोन एक्सएस म्याक्स


एप्पलले एक्स संस्करणको ठूलो स्क्रिनवाला फोन पनि बनाएको खबर छ । यसको नाम आइफोन एक्सएस म्याक्स रहने र स्क्रिन ६.५ इन्चको हुने उल्लेख गरिएका छन् ।

यसमा तीनवटा रेअर क्यामरा हुनेछ । मूल्य ९९९ देखि ११०० अमेरिकी डलरसम्म पर्ने अनुमान छ । आइफोन एक्सएस म्याक्समा एप्पल पेन्सिल पनि हुने अनुमान गरिएको छ ।

किनकी प्रतिस्पर्धी सामसुङले महत्वका साथ बजारमा ल्याउँदै आएको ग्यालेक्सी नोट फोनहरुसँग बजारमा प्रतिस्पर्धा गर्नका लागि एप्पलले यसमा पेन्सिलको सुविधा राख्ने बताइएको छ ।

आइफोन एक्सआर


यो फोन कम बजेट भएकाहरुका लागि फोकस गरेर ल्याउन लागिएको हो । आइफोन एक्सआरमा ६.१ इन्चको एलसिडी स्क्रिन हुनेछ भने सिंगल रेअर क्यामरा रहनेछ । यसको डिजाइन आल्मुनियमको हुने बताइएको छ ।

यो फोनको मूल्य अरु फोनको भन्दा कम हुने अपेक्षा छ । यसको बजार मूल्य ६९९ देखि ८४९ अमेरिकी डलरको बिचमा रहने बताइएको छ ।

यो बाहेक एप्पलले सबैभन्दा कम बजेको आइफोन एसईको नयाँ मोडल आइफोन एसई टू पनि ल्याउने सक्ने अमेरिकी पत्रिका ब्लूमबर्गको पछिल्लो रिपोर्टमा उल्लेख गरिएको छ ।

अरु के के आउँदै छन् ?


एप्पलले क्यालिर्फोनियामा हुने विशेष कार्यक्रममार्फत पुनर्संरचित एप्पल वाच ल्याउने छ । गुगल र सामसुङले स्मार्ट वाचमा ठूलो प्रगति गरेकाले एप्पलले पनि एप्पल वाच फोर ल्याउने तयारी गरेको छ।

नयाँ वाचको डिस्प्ले ठूलो हुनेछ । यसमा क्लिक फ्रि बटन हुनेछ । यस्तै नयाँ आइप्याड प्रो पनि सार्वजनिक हुँदैछ । यसैगरी नयाँ म्याक र म्याकबुक पनि आउँदैछ ।

भदौ २७, २०७५ मा प्रकाशित
प्रतिक्रिया दिनुहोस्