निक–प्रियंका : पहिलो भेट र प्रेम

प्रियंका चोपडासँगको पहिलो भेटको कुरा निक जोनसले खुलाए

अमेरिकी संगीतकर्मी तथा अभिनेता निक जोनस र अभिनेत्री प्रियंका चोपडाको प्रेम सम्बन्धले औपचारिकता पाएको पनि महिना दिन नाघिसकेको छ ।

बलिउडपछि हलिउडमा आफूलाई स्थापित गर्ने क्रममा रहेकी प्रियंका र निकको इनगेजमेन्ट भइसकेको छ । दुवै परिवारका सदस्यबिच भेटघाट पनि भएको छ र निक–प्रियंकाले अहिले औपचारिक रुपमा प्रेम बाँची रहेका छन् । उनीहरुको विवाहको मिति भने सार्वजनिक भएको छैन ।

तर पहिलो भेट कसरी भएको थियो र सम्बन्ध कसरी प्रेममा परिणत भयो भन्नेबारे निक जोनसले विस्तृतमा बताएका छन् । २५ वर्षका निक केही दिनअघि अमेरिकी टेलिभिजन शो द टुनाइट शो स्टारिङ्ग जिमी फालोनमा गएका थिए । उनले जिमीसँगको कुरकानीको क्रममा प्रियंकासँगको आफ्नो भेट बारे बताएका हुन् ।

निकका अनुसार प्रियंकासँग साथी मार्फत भेट भएको हो, त्यो पनि प्रत्यक्ष होइन ‘भर्चुअल वे’ मा । आफूहरुबिच सबैभन्दा पहिले एसएमएस आदानप्रधान भएको र त्यसमै झण्डै ६ महिना बितेको निकले बताएका छन् ।

निकले भने, ‘साँचो कुरा भन्दा साथी मार्फत भेट भएको हो, सुरुमा हामीले एकअर्कालाई म्यासेज गरेका थियौँ । व्यक्तिगत रुपमा भेट भने त्यसको ६ मिहनापछि मात्रै भएको हो ।’

त्यसपछि सन् २०१७ को मेट गालामा सँगै रेड सहभागी भएको र त्यो बेलासम्म पनि आफूहरु राम्रो साथी मात्रै रहेको निकले दाबी गरेका छन् । उनले भने, ‘मेट गालामा सँगै गयौँ, हामी राम्रो साथी थियौँ । कुरा त भइरह्यो, र पनि हामी साथी थियौँ र सँगै केही ठाउँमा गयौँ पनि ।’

त्यो बेलादेखि नै साथीहरुले ‘तिमिहरु प्रेम सम्बन्धमा हो ?’ भनेर सोध्ने गरेको र आफूहरु साथी मात्रै भएकाले ‘नो’ भन्ने गरेको निकले खुलाए ।

तर पाँच मिहनाअघिको भेट भने विशेष बनेछ । उनले भने, ‘झण्डै पाँच महिनाअघि हाम्रो फेरि भेट भयो, मिडियामा कुराहरु आइरहे, हामीलाई पनि लाग्यो सायद प्रेममा छौँ । र अहिले हामी खुशी छौँ।’

निकले प्रियंकाको प्रशंसा गर्दै भने, ‘सी इज द बेस्ट ।’

निक अन्तर्वार्ताका लागि जिमीको शोमा गएका थिए । उनी अघि जिमीसँग अन्तर्वार्तामा थिए, प्रियंका तल दर्शक दीर्घामा । प्रियंका आफूसँगै आएको कुरा निकले नै कार्यक्रममा खुलाए । उनले जिमीलाई कानेखुसी गर्दै भने, ‘वास्तवमा उनी अहिले यहिँ छन् ।’

निकले यति भनेपछि जिमीले यताउता हेर्न थाले, निकले दर्शक दीर्घामा देखाए । प्रियंकाले उढेर हात हल्लाइन्, उनी खुलेर हाँसेकी थिइन् ।

निकले आफूहरुको मुम्बई भ्रमणबारे पनि बताए । प्रियंकाको परिवारलाई आफ्नो सपरिवारसहित भेटेर हिन्दू संस्कार अनुसारको ‘रोका’ गर्दाको अनुभव उनले बताएका हुन् । रोका संस्कार आफू र बुवाआमाले निकै उत्साहका साथ सेलिब्रेट गरेको निकले बताएका छन् ।

उनले भने, ‘रोका वास्तवमा दुवै तर्फका परिवारबाट विवाहका लागि हुने आधिकारिक प्रतिबद्धता रहेछ, विशेष पूजा भयो, प्राथना गरियो । सबै परिवारका सदस्यसँग भेटघाट हुनु सबैभन्दा राम्रो पक्ष रह्यो ।’

आफ्ना बुवाआमाले रोका संस्कार निकै इन्जोए गरेको निकले जिमीलाई बताएका थिए । रोकापछि इन्स्टाग्राममा प्रियंकासँगको तस्बिर पोस्ट गर्दाको क्षण निकै विशेष रहेको निकले बताएका थिए । इन्स्टाग्राममा तस्बिर राखेपछि आफूहरुको सम्बन्धले औपचारिकता पाएको महसुस भएको निकले बताउँदा प्रियंका हाँसेकी थिइन् ।

जिमीले निकसँग ‘प्रियंका–निक’ को कुनै निकनेम भए नभएको बारे सोधे । निकले भने, ‘सी लाइक्स प्रिक’, तर उनलाई त्यति मन परेको रहेनछ यो नाम । निकले यसबारे खुलाउँदा प्रियंका निकै हाँसेकी थिइन् ।

प्रियंका र निकको निकनेम जे होला, तर अहिले उनीहरु एकअर्काको प्रेममा गहिरोसँग डुबेका छन् । यो कुरा उनीहरुका पछिल्ला उपस्थितिले देखाउने गरेका छन् ।

भदौ २८, २०७५ मा प्रकाशित
प्रतिक्रिया दिनुहोस्