अनुसन्धानमा खटिनु कहाँकहाँ, निर्मलाका बुबाआमाको चियो गर्दैछन् प्रहरी

रिपोर्टर्स क्लबमा आफ्ना कुरा राख्ने क्रममा भक्कानिएर रुँदै बलात्कारपछि हत्या गरिएकी बालिका निर्मला पन्तका बुवा यज्ञराज पन्त । तस्बिर-बर्षा शाह/देश सञचार

काठमाडौँ – घटनाको दुई महिना पुग्न लाग्दा समेत कञ्चनपुरकी १३ वर्षीय बालिकाको बलात्कारपछि हत्या गर्ने अपराधी पक्राउ गर्न नसकेको सरकारले न्याय माग्न काठमाडौँ आएका उनका आमाबुवाको निगरानीका लागि ठूलो संख्यामा सादा पोशाकका प्रहरी खटाएको छ ।

निर्मलाका बुवा यज्ञराजले आफूहरु बसेको होटल, हिँडेको गल्ली लगायतका स्थानमा सादा पोशाकका प्रहरीले खानतलासी लिने र तस्बिर खिच्ने गरिरहेको बताएका छन्। सादा पोशाकका प्रहरीको यो कार्यले आफूहरु आतंकित भएको उनले बताए।

बिहीबार पत्रकार सम्मेलनमा बोल्दै उनले भने, ‘मेरो छोरी हराउँदा खोज्न नजाने प्रहरी आज किन मेरो पछि लागिरहेको छ, हामी जहाँ गयो त्यहीँ प्रहरी किन आइरहेको छ? यो कार्यक्रममा पनि प्रहरीका घुमुवाहरु आएको म देखिरहेको छु। प्रहरीले न्याय माग्न आएको मलाई निगरानीमा राख्ने कि घटनास्थलमा गएर अनुसन्धान गर्ने?’

मंगलबार निर्मला पन्तको न्यायका लागि कञ्चनपुरका ९ जना महिला अधिकारकर्मी महिलाको साथमा निर्मलाका बुवा यज्ञराज र आमा दुर्गादेवी काठमाडौँ आएका हुन्।

निर्मलाको न्यायका लागि काठमाडौँ आएकी कञ्चनपुरकी महिला अधिकारकर्मी शारदा चन्द । तस्बिर : बर्षा शाह /देश सञ्चार ।

आफूहरु काठमाडौ झरेदेखि नै नचिनेका व्यक्तिहरुले आफुहरुको चियोचर्चाे गरिरहेको र उनीहरुबाट असुरक्षित महसुस गरेको पन्तले बताए।
पत्रकार सम्मेलनमा यज्ञराजसँगै काठमाडौँ आएकी अधिकारकर्मी शारदा चन्दले पनि सादा पोशाकका प्रहरी आफूहरु बसेको गेष्ट हाउसमै आएर खानतलासी लिन थालेको बताइन्।

उनले एक व्यक्तिले आफूहरु बसेको होटलमा तस्बिर खिचेपछि विवाद पनि भएको बताइन्। ‘हामी गेष्ट हाउसमा बसिरहेका थियौँ चार जना केटाहरु आएर वरीपरि घुम्न थाले हामीले को हो तपाईहरु भन्दा केही बोल्न मानेनन्, मैले एक जनाको तस्बिर खिचेपछि उनी फोटो डिलिट गर्न भन्दै मसँग रोए। केरकार गर्दा त आफू प्रहरीको मान्छे भएको उनले बताए।’

उनले प्रश्न गरिन्, ‘किन प्रहरी हाम्रो पछि लागिरहेको छ ? प्रहरीले घटनास्थलमा गएर अपराधी पत्ता लगाउने कि न्यायको लडाईमा आएका हामीहरुलाई आतंकित पार्ने ?’

भदौ २८, २०७५ मा प्रकाशित
प्रतिक्रिया दिनुहोस्