रोनाल्डोमाथि बलात्कार आरोप

रोनाल्डोमाथिको बलात्कार आरोप बारे खबर छाप्ने पत्रिका अडिग

स्टार स्ट्राइकर क्रिष्टियानो रोनाल्डोमाथि एक अमेरिकी महिलाले बलात्कारको आरोप लगाएको सम्बन्धी खबर सबैभन्दा पहिले छापेको जर्मन साप्ताहिक म्यागजिन आफ्नो खबरमा अडिग रहेको छ ।

रोनाल्डोका वकिलले बुधबार म्यागजिनमा प्रस्तुत गरिएका कागजातहरु झुट रहेको तथा मुख्य प्रमाणहरुलाई बंग्याइएको बताएका थिए । त्यसको जवाफमा जर्मन म्यागजिन डेर स्पिगलले सबै कागजात पूर्ण रुपले आधिकारिक रहेको दाबी गरेको हो ।

३३ वर्षका रोनाल्डोमाथि ३४ वर्षकी अमेरिकी महिला क्याथरिन मायोर्गाले बलात्कारको आरोप लगाएकी हुन् । सन् २००९ मा लस भेगासको होटल रुममा आफूमाथि रोनाल्डोले दुर्व्यवहार गरेको उनको आरोप छ । यो आरोप रोनाल्डोले स्पष्ट रुपमा अस्वीकार गरेका छन् ।

पत्रिकाले झुटा प्रमाणको भरमा खबर छापेको आरोप रोनाल्डोका वकिलले लगाएको भोलिल्ट पत्रिकाले आफूहरुसँग विभिन्न माध्यमबाट प्राप्त भएका सयौँ कागजात रहेको दाबी गरेको हो ।

क्याथरिनका साथमा लस भेगासको नाइट क्लबमा रोनाल्डो ।

डेर स्पिगलले आफूहरुले छापेको खबरमा अडिग रहेको र प्राप्त प्रमाणहरु सही नरहेको भन्ने विश्वास गर्ने कारणहरु नपाइएको उल्लेख गरेको छ । हरेक खबर छाप्नुअघि फ्याक्ट चेक गरिएको कानुनी परामर्श पनि लिइएको स्पिगलले जनाएको छ ।

रोनाल्डोका वकिल पिटर क्रिष्टिएन्सनले जारी गरेको वक्तव्यमा रोनाल्डोले सबै आरोप ‘स्पष्ट रुपले अस्वीकार गरेको र आरोप निकै घृणित रहेको’ उल्लेख गरिएको छ ।

यसअघि जर्मनीको पत्रिका डेर स्पिगलमा आरोप सम्बन्धी खबर सबैभन्दा पहिले छापिएपछि रोनाल्डोले ‘फेक न्युज’ भन्दै अस्वीकार गरेका थिए । रोनाल्डोका प्रतिनिधिले साप्ताहिक म्यागजिन विरुद्ध कानुनी उपचारको बाटो प्रयोग गर्ने पनि बताएका थिए ।

रोनाल्डोका वकिल क्रिष्टिएन्सनले आरोप सम्बन्धी खबर प्रकाशित गर्ने सञ्चार माध्यम निकै गैरजिम्मेवार रहेको उल्लेख गरेका छन् । चोरी गरिएको र सजिलै म्यानुपुलेट गर्न मिल्ने डिजिटल कागजातको भरमा आरोप लगाएको उनले बताएका छन् । यस्तै कागजातको महत्वपूर्ण भाग पूर्णरुपले परिवर्तन गरेर झुट बनाइएको रोनाल्डोका वकिलले बताएका छन् ।

डेर स्पिगलका अनुसार क्याथरिनले घटना लगत्तै लस भेगास प्रहरीमा उजुरी दिएको उल्लेख गरेको थियो । यस्तै सन् २०१० मा अदातल भन्दा बाहिर तीन लाख ७५ हजार अमेरिकी डलर लिएर घटनाका बारेमा सार्वजनिक रुपमा नबोल्ने सहमति गरेको पनि बताइएको छ ।

रोनाल्डोका वकिल क्रिष्टिएन्सनले स्पष्ट पार्दै भनेका छन्, ‘सन् २००९ मा लस भेगासमा जे भएको थियो त्यो पूर्ण रुपमा सहमतिमा भएको थियो ।’

सन् २०१० मा भएको सहमति बारेमा रोनाल्डोले अस्वीकार नगरेको तर यसको अर्थ गल्ती भएको वा त्यसलाई स्वीकार गरेको भन्ने नहुने वकिलले उल्लेख गरेका छन् । हुँदै नभएको घटनाका कारण आफ्नो प्रतिष्ठा खराब नहोस् भनेर रोनाल्डोले क्याथरिनलाई ठूलो रकम दिन तयार भएको उल्लेख गरिएको छ ।

लस भेगास प्रहरीले घटनाका सम्बन्धमा पुनः अनुसन्धान सुरु गरेको छ । रोनाल्डोले यस सम्बन्धी अनुसन्धानको क्रममा हुने सबै प्रक्रियाको सर्वाधिकार अमेरिका र युरोपमा रहेका आफ्ना वकिललाई दिएको र सत्य बाहिर आउनेमा पूर्ण विश्वास रहेको उल्लेख गरिएको छ ।

असोज २६, २०७५ मा प्रकाशित
प्रतिक्रिया दिनुहोस्