बज्यो गलत राष्ट्रिय गान, जित्यो देशको इतिहासमै पहिलो खेल

सञ्चार संवाददाता

जिब्रालटारले आफ्नो फुटबल इतिहासमा पहिलो प्रतिस्पर्धात्मक खेलमा जित निकालेको छ । युरोपियन फुटबलको प्रशासकीय निकाय युइएफएको नयाँ प्रतिस्पर्धा नेशन्स लिग अन्तर्गत शनिबार राति भएको खेलमा जिब्रालटारले अर्मेनियालाई १–० ले हराएको हो ।

अवे मैदानमा भएको खेलमा जिब्रालटारलाई ऐतिहासिक जित दिलाउनेका लागि ५० औँ मिनेटमा जोसेफ जिपोलिनाले पेनाल्टी मार्फत गरेको गोल निर्णायक बन्यो । जिब्रालटारले सन् २०१३ मा युइएफएको सदस्यता पाएको हो ।

उसले २३ प्रतिस्पर्धात्मक खेलमा पहिलो जित निकालेको हो । कुनै पनि प्रतिस्पर्धामा जिब्रालटारले पाएको यो पहिलो अंक हो । उसले सन् २०१६ को युरोकप छनौट र सन् २०१८ को विश्वकप छनौटका सबै खेलमा हार बेहोरेको थियो । यसअघि उसले मैत्रीपूर्ण खेलमा माल्टा र लात्भियालाई हराएको थियो ।

बज्यो गलत राष्ट्रिय गान

यो खेलमा घरेलु देश अर्मेनियाको राष्ट्रिय गान सही बजेको थियो । तर जिब्रालटारको राष्ट्रिगान भनेर अर्कै बजाइयो । जिब्रालटारको राष्ट्रिय गान बजाउनु पर्नेमा गल्तीले लिचेस्टाइनको राष्ट्रिय गान बजाइएको थियो ।

अर्मेनियाले यो गल्तीका लागि जिब्रालटारसँग माफी मागेको छ । अर्मेनियाको फुटबल एसोसिएसनले गल्तीका लागि माफी मागेको जिब्रालटारको फुटबल एसोसिएसनले जनाएको हो ।

असोज २८, २०७५ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू