प्रदेश २ मा कुपोषणको अवस्था भयावह

सांकेतिक तस्बिर

जनकपुरधाम – प्रदेश २ मा कुपोषणको अवस्था भयावह रहेको पोषणका लागि नागरिक समाज सञ्जाल नेपाल (सिसान) को एक तथ्यांकले देखाएको छ । सिसानको तथ्यांक अनुसार देशको ७ वटै प्रदेशभन्दा प्रदेश २ को अवस्था भयाभह रहेको छ ।

प्रदेश २ का बालबालिकामा ३७ प्रतिशतमा पुड्कोपन, १४.४ प्रतिशतमा ख्याउटेपन, ३६.८ प्रतिशत बालबालिकामा कमतौल, ५९.४ मा रक्तअल्पता रहेको छ जसमध्ये महिलामा ५७.८ प्रतिशत रहेको जनाइएको छ ।

अन्य प्रदेशको तुलनामा सही पोषणको कमीले प्रदेश २ को पोषण स्थिति भयावह हुन पुगेको बहुक्षेत्रीय पोषण योजनाका जिल्ला संयोजक हेमन्त झाले बताए ।

प्रदेश २ मा सबै कुरा सजिलै उपलब्ध गर्न सक्ने वातावरण रहेपनि जनचेतनाको अभावले बालबालिका कुपोषणको शिकार भएको उनले बताए ।

नेपाल जनसांख्यकीय सर्वेक्षण २०१६ अनुसार ५ वर्ष मूनिका ३६ प्रतिशत बालबालिका दीर्घ कुपोषण तथा पुड्कोपनबाट प्रभावित भएका छन् ।

१० प्रतिशतमा ख्याउटेपन र २७ प्रतिशत कम तौलको कारणले पीडित भइरहेका छन् । यस्तै, ६ महिनादेखि ५ वर्ष मूनिका ५३ प्रतिशत बालबालिकामा रक्तअल्पता रहेको पाइएको छ ।

धनुषा जिल्लाका १८ वटा स्थानीय तहहरूमध्ये हालसम्ममा जनकपुरधाम उप(महानगरपालिका, धनौजी गाउँपालिका, नगराइन नगरपालिका, मिथिला बिहारी नगरपालिका र औरही गाउँपालिकामा बहुक्षेत्रीय पोषण योजना लागूसमेत हुन नसकेको संयोजक झाले जनाए ।

एउटा कुपोषित बच्चाले युवा भएर कुपोषित बच्चा नै जन्माउने र यसले समस्या अझै बल्झिने भएकोले समयमै समस्या समाधानका लागि खानपानमा उचित ध्यान दिन आवश्यक रहेको उनको भनाई छ ।

जनकपुरमा एक कार्यक्रम आयोजना गरेका सिसानले प्रदेश २ का आठ जिल्लामध्ये सिरहावाहेक सबै जिल्लामा बहुक्षेत्रीय पोषण योजना लागू गरिएको समेत जनाएको छ।

मंसिर १७, २०७५ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू