सूचनाको हक प्रयोग गरे संस्थागत भ्रष्टाचार घट्छः तिम्सिना

पोखरा – राष्ट्रिय सूचना आयोगका आयुक्त यशोदा तिम्सिनाले पत्रकार जगतले सूचनाको हक प्रयोग गरेर सूचना बाहिर ल्याउन सके संस्थागत भ्रष्टाचार घट्ने बताएकी छिन्।

पत्रकार महासंघ कास्कीले पोखरामा सूचनाको हकः कार्यान्वयको अवस्थाका बारेमा आयोजना गरेको अन्तरक्रिया कार्यक्रममा तिम्सिनाले पत्रकारले खोजमूलक समाचारमा चासो नदिँदा सूचना लुकाउने र संस्थागत भ्रष्टाचार गर्नेहरुको आत्मबल झनै बढेकोे बताएकी हुन्।

संविधानले प्रदान गरेको सुचनाको हक अधिकार सबै नागरिकको पहुँचमा अझै पुग्न नसकेको बताउँदै तिम्सिनाले सूचनाको अधिकारको प्रयोग गरी सूचना लिन सक्ने संवैधानिक अधिकार भएपनि नागरिकले सो अधिकारको प्रयोग पूर्ण रुपमा गर्न नसकेको बताएकी छिन्।

आयुक्त तिम्सिनाले सूचनाको हकमा सबै नागरिकको उत्तिकै समान अधिकार रहेको जनाउँदै यस विषयमा पत्रकार जगतले माध्यम बन्दै नागरिकलाई सुसूचित गर्न आग्रह गरिन्।

राज्यको चौथो अङ्ग सञ्चारजगतले सूचनाको पत्र–पत्र केलाउँदै नागरिक समक्ष पुर्याउनु पर्ने बताउँदै उनले भनिन् ‘तपाईहरुको काँधमा ठूलो जिम्मेवारी छ, तपाईहरु माध्यम बनेर आमनागरिकलाई सुसूचित गर्नुस्।’

प्रेस स्वतन्त्रता सेनानी बद्रीविनोद खनाल, पत्रकार महासंघका केन्द्रीय सदस्य रामकृष्ण ज्ञवाली, पत्रकार महासंघ कास्कीका अध्यक्ष दीपेन्द्र श्रेष्ठ लगायतले आफ्नो धारणा राखेका थिए।

अन्तरक्रिया कार्यक्रम पत्रकारहरुले सरकारी कार्यालयहरुले सूचना दिन आनाकानी र ढिलासुस्ती गर्ने, प्रविधि मैत्री नभएको र धेरै समय धाउनु पर्नेजस्ता समस्या भोग्नु परेको गुनासो गरेका थिए। कार्यक्रममा कास्कीमा क्रियाशील ६० जना पत्रकारहरुको सहभागिता रहेको थियो।

मंसिर २०, २०७५ मा प्रकाशित
प्रतिक्रिया दिनुहोस्