पत्रकारले पहुँचमा रहेकाहरुलाई मात्र स्थान दिएको मन्त्रीको गुनासो

पोखरा – पत्रकारहरुले पहुँचवालाहरुको मात्रै आवाजलाई प्राथमिकता दिन नहुने गण्डकी प्रदेशका सामाजिक विकास मन्त्री नरदेवी पुनले बताएकी छन् ।

सञ्चारिक समूह नेपाल गण्डकी प्रदेशको पाँचौँ अधिवेशनमा बोल्दै उनले अधिकांश पत्रकारले राजनैतिक पहुँच र शक्तिसँग नजिक रहेर समाचार सम्प्रेषण गर्दा शक्तिविहिनहरुको आवाज प्राथमिकता पर्न नसकेको बताइन् ।

उनले सामाजिक विकास र रुपान्तरणकालागि पत्रकारको भूमिका महत्वपूर्ण हुने भन्दै राजनीतिक बाहेकका समाचारलाई पनि पत्रकारले महत्व दिनु पर्ने बताइन् ।

उनले पत्रकार महिलाका चुनौति कैयन भएका भन्दै महिला मैत्री सञ्चार नीति मार्फत यस क्षेत्रमा महिला पत्रकारलाई स्थापित गर्नुपर्नेमा जोड दिइन् ।

कार्यक्रममा गण्डकी प्रदेशका सांसद राजिव पहारीले सत्य समाचारका लागि पत्रकारले आफ्नो भूमिकालाई भुल्न नहुँने बताए । उनले पछिल्लो समय बढ्दो महिला हिंसालाई न्युनिकरण गर्न पत्रकार महिलाहरुको भूमिका महत्वपूर्ण हुने बताए ।

अर्का सांसद मिना गुरुङ्ग पत्रकारमा आम मानिसको धारणालाई बदल्न सक्ने क्षमता रहने भन्दै त्यसको दुरुपयोग गर्न नहुने धारणा राखिन् । कार्यक्रममा पत्रकार महासंघका केन्द्रीय सदस्य रामकृष्ण ज्ञवाली, प्रदेश अध्यक्ष त्रिभुवन पौडेल, संस्थाका सल्लाहकार नारायण कार्की, संस्थापक अध्यक्ष दुर्गा भण्डारी लगायतले महिला पत्रकारको संख्यात्मक र गुणात्मक वृद्धि गर्नु पर्नेमा जोड दिएका थिए ।

सञ्चारिक समूह गण्डकी प्रदेशका अध्यक्ष जमुना वर्षा शर्माले आफ्नो तीन वर्ष कार्यकाल सफल रहेको भन्दै पत्रकारिता मार्फत सामाजिक रुपान्तरणमा क्रियाशिल हुने धारणा राखिन् ।

कार्यक्रमको बन्द सत्रमा महासचिव कविता श्रेष्ठले प्रगति प्रतिवेदन र कोषाध्यक्षले आर्थिक प्रतिवेदन प्रस्तुत गरेका थिए । नयाँ नेतृत्व आज चयन हुँदैछ ।

पुस १, २०७५ मा प्रकाशित
प्रतिक्रिया दिनुहोस्