काठमाडौँ – सुदूरपश्चिम भन्ने बित्तिकै मानिसहरुले छाउपडी सम्झन्छन्, अभाव सम्झन्छन्, भोकमरी, गरिबी र पछौटेपन सम्झन्छन् तर सुदूरपश्चिम सम्भावनाको खानी पनि हो भन्ने कुरा थोरैको मनसपटलमा मात्रै छ ।

राज्यबाट हेपिएको, पछाडि पारिएको, अवसर नदिइएको भन्दै लामोसमयदेखि सुदूरपश्चिम बासिन्दाले आवाज उठाइरहेका छन्, तर त्यहाँको प्रचूर सम्भावनाको उत्खनन अझै पनि हुन सकेको छैन ।

शुक्रबार राति दोस्रो नेपाल आइडल घोषित रवि ओडले यतिबेला आफ्नो नाम मात्रै चर्चाको शिखरमा पुगाएका छैनन् उनले सुदूरपश्चिममा पनि सम्भावनाहरु छन् भन्ने कुरा प्रमाणित गरेर देखाएका छन् ।

‘रवि एक गायक मात्र होइन, यो सुदूरपश्चिमको एक बिद्रोही आवाज हो । जो गरिबी, अशिक्षा, भोकमरी र अभावविरुद्ध लड्न तयार छ’, काठमाडौँमा पत्रकारिता गरिरहेका सुदूरपश्चिमका डिपि उपाध्याय भन्छन् ‘रवि मार्फत सुदूरपश्चिमले दिएको सन्देश हो, ‘हामीसँग हिरा छ, मात्र त्यसलाई छोपेर राखेको गरिबी नामको हिलो मिलेर पखाल्नु छ ।’

नेपाल आइडल सिजन-२ का विजेता हुनुअघि गीत गाउँदै कञ्‍चनपुरका रवि ओड। तस्बिर-सुलभ श्रेष्ठ/देश सञ्‍चार

यसअघि पहिलो नेपाल आइडल चलेका बेला सुदूरपश्चिममा अडिसन नै भएन, त्यो आयोजकको व्यवस्थापकीय बाध्यता पनि हुन सक्ला । आफ्नो क्षेत्रमा अडिसन नभएपछि सुदूरपश्चिमका प्रतिभाहरु कसैले नेपालगञ्ज त कसैले काठमाडौँबाटै अडिसन दिए, धनगढीकी सन्ध्या जोशी उत्कृट ९ सम्म पुगेर आउट भइन् ।

सायद सन्ध्याले सुदूरपश्चिममा पनि प्रतिभा रहेको छनक दिन सफल भइन्, दोस्रो नेपाल आइडलको अडिसन धनगढीमा पनि भयो । अडिसनमा ‘माया जाउँला रेलैमा’ बोलको गीत गाएका रविले निर्णायकको मन जितेपछि उनलाई काठमाडौँ बोलाइयो । उनको प्रतिभा निखारिदै गयो, दर्शक र निर्णायकको मन जितेका रवि ‘नेपाल आइडल’ बन्न सफल भए ।

रवि नेपाल आइडल बनेसँगै उनको जीवनका पछिल्ला पानाहरु पल्टिएका छन् सञ्चार माध्यमहरुमा । २०५४ सालमा जन्मिएका हुन् । आर्थिक अभावले भारतमा चौकीदारी गर्ने जाने परिवार मध्येको एक हो रविको परिवार । अर्थकै जोहो गर्न ७० सालको निर्वाचनमा म्यादी प्रहरी पनि बनेका थिए रवि, अनि धनगढीका विभिन्न दोहोरीसाँझमा उनले गीत गाएको कुरा अहिले चर्चामा ल्याइएको छ ।

रविको घर

नेपाल आइडल बनेसँगै गरिबीको जन्जिरले बाँधिएको झुपडीबाट उठेको एक बिद्रोही आवाजको परिचय पाएका छन् रविले ।

‘आफ्नो क्षेत्रमा लागिरहे सफता प्राप्त गर्न सकिन्छ, कहिलेकाहीँ चमत्कारै पनि हुनसक्छ भन्ने सन्देश रवि ओडको कथाबाट पाउन सकिन्छ’, कैलाली बहुमुखी क्याम्पसका प्राध्यापक सीताराम भट्ट भन्छन्, ‘खासमा गरिबी र पछौटेपनको जन्जिर तोडेर हिरो बन्न तपस्या चाहिँ चाहिन्छ । तपस्या गर्नेले नै सहानुभूति र सहयोग समर्थन पनि पाउने हो, रविको जीवनमा पनि यस्तै भएको हो ।’

कञ्चनपुरको कृष्णपुर नगरपालिकामा रविको सानो घर छ । टायलले छाएको झुपडीजस्तै सानो कच्चीघरमा जन्मे हुर्केका रवि नेपाल आइडल बन्छन् भन्ने कल्पना कसैले गरेका थिएनन् होला त्यतीबेला । तर नेपाल आइडल विजेताको घोषणा भएलगत्तै रविको ‘सानो झुपडी’ सहित सिंगो शहरमा दीपावली गरिएको छ ।
रविका बुवा रोजगारीका लागि अहिले पनि भारतमा छन् ।

जन्मदिने आमा गुमाइसकेका रवि कर्म दिने आमाका साथमा हुर्की–बढे, तर घरमा चुल्हो समेत बल्न नसक्ने अवस्था सानैदेखि बुझेका उनी कलिलो उमेरमै अर्थको जोहो गर्न भारत पनि पसेका थिए । २०७० सालको निर्वाचनमा उनी म्यादी प्रहरीमा भर्ना भए, तर गीत गाएर पनि केही गर्न सकिन्छ भन्ने हुटहुटी मनमा राखेका रवि धनगढीका दोहोरीसाँझमा गाउन थाले ।

यहीबिचमा धनगढीमा भएको नेपाल आइडलको अडिसनले उनलाई हिरो बनायो । सायद धनगढीमा अडिसन नभएको भए रविको यात्रा नेपाल आइडल विजेतासम्म पुग्न सक्ने थियो–थिएन त्यो यसै भन्न नसकिएला तर रविको यो यात्राले नेपाल आइडलका आगामी संस्करणहरु सुदूरपश्चिममा पक्कै होलान् ।

छाउपडी, अभाव, गरिबी, भोकमरी र अशिक्षाको भूमरीबाट निस्केर सुदूरपश्चिमको विद्रोही आवाज बन्न सफल भएका रवि अब आफ्नो सांगीतीक यात्रामार्फत सुदूरपश्चिमको अभावका विरुद्ध कसरी लड्नेछन् त्यो समयले बताउला ।

पुस ७, २०७५ मा प्रकाशित
प्रतिक्रिया दिनुहोस्