जनस्वास्थ्य माथि गम्भीर खेलवाड

लमही अस्पतालमा दुई वर्षदेखि छैन टिट्नेस खोप

दाङ–घाउँ चोट लाग्यो, फलामले काट्यो, पशु चौपायाले टोक्यो भने २४ घण्टा भित्र टिट्नेसको सुई (टिटि) लगाउनु पर्ने हुन्छ । तर, दाङको एक अस्पतालमा दुई वर्षदेखि टिटिको खोप छैन । उपचारको लागी लमही अस्पताल पुग्ने बिरामीलाई स्वास्थ्यकर्मीले टिटि लगाउन निजी क्लिनिकमा पठाउने गर्छन् ।

लमही अस्पतालमा दुर्घटनाबाट घाइते भएका बिरामी आउने गर्छन् । उनीहरुलाई टिटिको सूई नलगाएरै उपचार गर्ने गरिएको छ । बिरामीलाई बाहिरबाट किनेर लगाउन स्वास्थ्यकर्मीले भन्ने गरेका छन् ।

टिट्नेस खोप लगाउन भनिएको पर्चा। तस्बिर: दशरथ घिमिरे/देश सञ्चार

टिटि सुई निजी क्लिनिकबाट किनेर लगाउनु परेको लमही–६ की नारायणी पौडेलले बताइन् । ‘न टिटिको सुई छ । न रेबिज विरुद्धको खोप’उनले भनिन्–‘एक डोज सरकारीमा लगाएँ । त्यहाँ सकिएछ अनि मेडिकलमा पुगेर महंगो शुल्क तिरेर लगाए ।’

लमही अस्पतालमा दुई वर्षदेखि टिटिको औषधी नभएको स्टोर प्रमुख रुपलाल पाण्डेले बताए । ‘दुई वर्षदेखि यहाँ टिटि छैन्’लमही अस्पतालका स्टोर प्रमुख पाण्डेले भने–‘दुर्घटनाका बिरामीहरुलाई अन्यत्रबाट किनेर ल्याउनुस भन्ने गरेका छौँ ।’

सामान्य औषधी समेत अस्पतालमा राखिएको छैन् । लमही नगरपालिकाले लमही अस्पतालमा औषधी खरिद गरेर दिने गरेपनि जनस्वास्थ्यसँग जोडिएको टिटि र रेबिज विरुद्धको खोप किनिदिएको छैन् । सरकारी अस्पतालमा निःशुल्क पाइने खोप बजारमा भने पैसा तिरेर लगाउनु पर्छ । रेबिज विरुद्धको खोप प्रति डोज ५ सय र टिटिको ३५ रुपैयाँ पर्छ ।

निजी फार्मेसी भएकाहरु अस्पतालमा कार्यरत


लमही बजारमा फार्मेसी औषधी पसल खोलेर बसेकाहरु नै सरकारी अस्पतालका जागिरे छन् । उनीहरुले नै धेरै चाहिने औषधी तथा खोपहरु खरिदको लागी लमही अस्पतालमा माग नगर्दा अत्यावश्यक औषधी तथा खोपको अभाव हुदै आएको स्रोतले बताएको छ ।

‘तीन/चार जनाको बजारमा फार्मेसी छ । सरकारी अस्पतालमा उपचार गर्न जाँदा औषधी नपाएपछि बिरामीहरु उनीहरुले सञ्चालन गरेको फार्मेसीमा गएर औषधी किन्छन्’स्रोतले भन्यो–‘धेरै चाहिने औषधी किन्नको लागी सिफारिसनै हुँदैन् । अनि किन नहोस अभाव ।’

पुस २९, २०७५ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू