भेनेजुएलामा राजनीतिक संकट

विपक्षी नेताले आफूलाई अन्तरिम राष्ट्रपति घोषित गरे, ट्रम्पले गरे समर्थन

सञ्चार संवाददाता
Created with sketchtool.

सम्बन्धित

अमेरिकी राष्ट्रपति डोनाल्ड ट्रम्पले भेनेजुएलाका विपक्षी नेता क्आन गुएडोलाई अन्तरिम राष्ट्रपतिको रुपमा मान्यता दिएको बताएका छन् ।

भेनेजुएलामा सरकारविरुद्ध प्रदर्शन चलिरहेका बेला अमेरिकी राष्ट्रपति ट्रम्पले गुएडोलाई अन्तरिम राष्ट्रपतिका रुपमा मान्यता दिएको बताएका छन् ।

भेनेजुएलामा हजारौँ मानिसले अहिलेका राष्ट्रपति निकोलश मादुरोविरुद्ध प्रदर्शन गर्दै आएका छन् । गुएडोले मादुरोविरुद्धको प्रदर्शनको नेतृत्व गरिरहेका छन् ।

३५ वर्षका गुएडोले बुधबार काराकासमा भएको प्रदर्शनको क्रममा आफूलाई देशका अन्तरिम राष्ट्रपति घोषित गरेका थिए । यसको केही मिनेटपछि नै ट्रम्पले उनको साथ दिएका हुन् ।

दक्षिण अमेरिका ब्राजिल, कोलम्बिया, पेरुसहितका देशले गुएडोलाई भेनेजुएलाको अन्तरिम राष्ट्रपतिका रुपमा मान्यता दिएका छन् र उनको पक्षमा उभिएका छन् ।

अमेरिकी राष्ट्रपति ट्रम्पले एक ट्वीट मार्फत मादुरोको नाजायज सरकारका कारण भेनेजुएलाका नागरिक लामो समयदेखि अप्ठ्यारोमा रहेको उल्लेख गरेका छन् । उनले ट्वीट मार्फत नै आधिकारिक रुपमा गुएडोलाई भेनेजुएलाको अन्तरिम राष्ट्रपति मान्ने उल्लेख गरेका हुन् ।

केही वर्षदेखि प्रायः सखाप जस्तै बनेको देशका आर्थिक अवस्थालाई अनदेखा गरेको आरोप निकोलश मादुरोमाथि छ । मुद्रास्फिती, विद्युत आपूर्ति बन्द तथा आधारभूत आवश्यक सामग्रीको अभावले भेनेजुएलाको जनजीवन कष्टकर बनेको छ । आर्थिक मन्दीकै कारण लाखौँ भेनेजुएलाली छिमेकी देश कोलम्बियासहितका क्षेत्रमा शरण लिन बाध्य छन् ।

मादुरोले यो महिनाको सुरुमा दोस्रो कार्यकालका लागि राष्ट्रपतिको शपथ लिएका थिए । विपक्षीले बहिष्कार गरेको तथा व्यापक मात्रामा धाँधली भएको आरोप लागेको चुनावमा मदुरो विजयी भएका थिए ।

भेनेजुएलाको राजधानी काराकासमा बुधबार ठूलो प्रदर्शन भयो । यसक्रममा प्रदर्शनकारी र सरकारी सुरक्षाकर्मीबिच झडप समेत भएको छ ।

गुएडो भेनेजुएलाको नेशनल एसेम्ब्लीका अध्यक्ष हुन् । उनले यसअघि सरकारविरुद्ध अवज्ञा आन्दोलनका लागि अपिल गरेका थिए । यो प्रदर्शन सुरु भएको पहिलो दिनमै चारजनाको ज्यान गएको मानवअधिकार कार्यकर्ताले बताएका छन् ।

अहिले लाखौँ मानिस सडकमा आएर सरकार विरोधी नारा लगाएका छन् । यस्तै केही यस्ता गुट पनि सडकमा आएका छन्, जो अहिलेका राष्ट्रपति मादुरोको पक्षमा छन् ।

माघ १०, २०७५ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू