भ्रष्टाचार विरुद्ध महाअभियान!

‘सय कडा दश’ हेर्दा मेरो रगत उम्ल्यो, शरीरमा काँडा फूले

दिनेश न्यौपाने –

भ्रष्टाचार कानुन र नैतिकता विपरितको क्रियाकलाप हो । आर्थिकदेखि नैतिक सबै कुराहरुमा रहेको भ्रष्टाचार अहिले विश्वकै समस्या बनेको छ । हाम्रो मुलुक नेपाललाई भने आर्थिक भ्रष्टाचारले धेरैक्षतविक्षत बनाएको छ । आचरण र नीतिगत रुपमा त झन् ठूलो भ्रष्टाचार । नेपालमा नीतिगत आर्थिक भष्टाचारले जरा गाडेको छ र यो जरालाई उखेल्ने हिम्मतले सार्थकता पाएको छैन ।

नीतिगत रुपमा हुने भ्रष्टाचारमा सर्वसाधारणको चासो र दृष्टि नपुग्ने भएकाले यस्ता विषयमा न छलफल हुन्छन् न त पर्याप्त अनुसन्धान नै । भ्रष्ट आचरण समाज, परिवार र मुलुकका लागि क्यान्सर जस्तै रोग हो । यसले न त मुलुकलाई उभो लाग्न दिन्छ न परिवार र छरछिमेक ।

यहि विषयमा उदाङ्गो चरित्र चित्रण गरेको छ चलचित्र ‘सय कडा १०’ ले । मैले आजसम्म थुप्रै चलचित्र हेरे हुँला । ति मध्ये केही चलचित्र हलबाट बाहिर नआउँदै त्यहिँ बिर्सेर पनि आएको छु । तर केही चलचित्र कहिल्यै नबिर्सने गरि मानसपटलमा छन् ।

सामाजिक, आर्थिक र सांस्कृतिक विषयमा निर्माण गरिएका थुप्रै चलचित्र छन् । ति मध्ये केहि सफल त केहि असफल । दुई महिनापछि चलचित्र ‘सय कडा १०’ हेर्ने अवसर जुर्यो । चलचित्र हेर्न हलमा जाँदा कहिले हाँसेर बसिन्थ्यो त कहिले आँशु झारेर । चलचित्रमा कुनै परिदृष्य यस्ता छन् जसलाई हेर्दा शरीरको आलो रगत उम्लेर आउँछ ।

छिनमै हास्ने दर्शकहरुका आँखामा छिनमै आँशु झार्न सक्ने यो चलचित्रले मुलुकको दर्दनाक अवस्थालाई चित्रण गर्दा शरीर जुरुङ, जुरुङ भइरह्यो । चलचित्रमा कलाकार राजाराम पौड्याल, मनोज गजुरेल, अमृत ढुंगाना, करुणा श्रेष्ठ, उत्सव न्यौपाने लगायतको जीवन्त अभिनय छ ।

चलचित्र हेर्दा यस्तो अनुभूति हुन्छ कि म कुनै हलमा चलचित्र हेरिरहेको छैन । म त मेरो देशको कटु यथार्त नियालीरहेको छु माथिबाट । म देखिरहेको छु भ्रष्टाचारमा लिप्त रहेका मेरो देशका नेताहरुको कुकृत्य, अनि सामाजिक अभियन्ताका नाममा लूट मच्चाइरहेका हरुको यथार्त अनुहार ।

दिनेश न्यौपाने

मनले सोच्दै थियो, खासमा भ्रष्टाचारले देश मात्रै होइन, समाज र पारिवारमा कस्तो असर पर्दो रहेछ ? कसरी हुने रहेछ भ्रष्टाचार ? कसको उक्साहटमा कसका लागि ? कसरी कसरी हुने रहेछ ? बाबा यति सानो मुलुकमा भ्रष्टाचारको यति ठूलो अनि भयंकर जालो पो ? अनि कसरी बन्दो हो मुलुक सम्बृद्ध ?

मनमनै मैले हाम्रा प्रधानमन्त्री केपी शर्मा ओलीले देशलाई सम्बृद्ध पार्ने भन्दै ठोकेका भाषणका मिठा शब्द पनि सम्झेँ । अनि भ्रष्टाचारीको मुख पनि हेर्दिन भन्ने उहाँको अभिव्यक्ति सम्झँदा त झन कठै भन्न मन लाग्यो । यस्तै अवस्था रहे मेरो जीवन रहेसम्म भ्रष्टाचार मुलुकबाट हट्न सक्दैन, जाबो प्रधानमन्त्रीको भाषण, अनि म मनमनै हाँसे पनि ।

रामशरण पाठकको निर्देशन रहेको चलचित्र सय कडा १० अहिले देशभर प्रदर्शन भैरहेको छ । चलचित्रमा देश कसरी बाँचिरहेको छ ? त्यहि देशमा हामी के गर्दैछौ ? भ्रष्ट आचरणका (निजामती कर्मचारी) र यिनिहरुसँग सम्बन्ध भएका व्यक्तिले गर्ने क्रियाकलापले पार्ने असरका विषयमा चलचित्रले एउटा जलजला चित्र देखाएको छ ।

युवाहरुको सकारात्मक पहलमा चालिने सामाजिक अभियानका विषयलाई पनि चलचित्रले प्रोत्साहन दिएको छ । भ्रष्टाचार जस्तो भयानक रोगले ग्रसित नेपालको उपचार कसरी गर्ने त ? भ्रष्टाचारको उपचार नभए पछिल्लो पुस्ताले समेत भोग्नपर्ने अत्यन्त खराब नियती पनि चलचित्रमा देखाउँने प्रयास गरिएको छ ।

देश बन्नको लागि राष्ट्र र राष्ट्रिय राजनीति सक्षम हुनुपर्छ । विश्वमा आर्थिक रूपले कम विकसित देशलाई हेर्दा ती देशहरूमा भ्रष्टाचार एउटा जटिल समस्याको रूपमा देखिएको छ । जसलाई त्यहाँको राष्ट्रिय राजनीतिले निवारण गर्न सकिरहेको पाईंदैन । नेपालको वर्तमान अवस्था पनि यस्तै छ । त्यसैले देश बनाउने सवालमा भ्रष्टाचारको समस्यालाई निवारण नगरेसम्म देशको आर्थिक उन्नति गर्ने आधारहरू बलियो बन्न सक्दैन भन्ने एउटा सन्देश चलचित्र छ ।

दर्शन नेपाल क्रिएसन प्रालिको ब्यानरमा बनेको चलचित्र सय कडा १० ले चर्चित हास्य कलाकार मनोज गजुरेलको एक नयाँ परिचय पनि सुरु भएको छ । सबैलाई सधैँ हसाई रहने गजुरेलले चलचित्रमा हसाएका त छन नै । उनको भूमिका पनि उत्तिकै वजनदार छ ।

‘इमानदारिताको इन्धनले चल्ने नेपालको एक मात्र रेल मनोज गजुरेल’ जस्ता उनका संवादले दर्शकलाई खुबै हसाउँछन् । चलचित्रमा उनको भूमिका रिल, र रियलमा फरक नपर्ने गरि देखाउँदा त्यसले पनि मन छुन्छ ।

वास्तवमा यो चलचित्र मात्रै नभएर आम नेपालीहरुका लागि भ्रष्टाचार हटाउन भूमिका खेल्ने एक महाअभियान हो भन्दा फरक पर्दैन । आगामी दिनमा पनि सय कडा दश जस्ता भ्रष्टाचार विरुद्धका चलचित्र निर्माण हुने हो भने केही हदसम्म भ्रष्टाचारीलाई नांगेझार पार्न मद्दत पुग्ने मेरो विश्वास छ ।

माघ २१, २०७५ मा प्रकाशित
प्रतिक्रिया दिनुहोस्